A Deputación abre oportunidades laborais ós mozos titulados da provincia con 70 novas bolsas de emprego en Europa
– O Presidente explicou que a estas becas, financiadas ó 70% pola UE, poderán optar, a custe cero, xóvenes con formación relacionada co medio ambiente, agroalimentación, gandeiría, pesca, informática, turismo, ciencias da vida e audiovisuais
– Os beneficiarios farán prácticas durante un período de entre 3 meses e 3 meses e medio en empresas de Alemaña, Austria, Italia, Portugal, República Checa e Reino Unido
– Dous dos beneficiarios das primeiras becas medioambientais da Deputación animaron ós mozos lucenses a apuntarse neste novo programa porque as estadías no estranxeiro supoñen “unha experiencia valiosísima para o currículo”
O Presidente da Deputación de Lugo, José Ramón Gómez Besteiro, presentou este xoves en rolda de prensa unha nova iniciativa impulsada polo organismo lugués e cofinanciada pola Unión Europa para abrir oportunidades laborais ós mozos titulados da provincia, tanto na Universidade, como en FP. Trátase de 70 bolsas de emprego en Europa, ás que, explicou Gómez Besteiro, poden optar, a custe cero, mozos lucenses recén titulados en profesións relacionadas cos seguintes sectores: medio ambiente, agroalimentación, gandeiría, pesca, informática, turismo, ciencias da vida (bioloxía, medicina, biomedicina, bioquímica, botánica…) e audiovisuais.
O mandatario provincial destacou que este novo proxecto de inserción laboral, “que damos a coñecer poucos días despois de poñer en marcha a segunda fase do Pacto Provincial polo Emprego, no que se inscribiron 764 persoas”, é posible grazas “á confianza que volveu a depositar en nós a Unión Europea”, pois trátase de becas concedidas por primeira vez á Deputación a través do Plan de Formación Leonardo da Vinci. Neste senso, o Presidente indicou que a institución luguesa foi “a segunda entidade galega, despois da Universidade da Coruña, á que lle outorgaron un maior número de becas Leonardo na convocatoria de 2011, e somos a única Deputación de Galicia á que lle aprobaron dous programas de becas diferentes: para universitarios e para Formación Profesional. As bolsas están dotadas cun orzamento de 309.000 euros, dos que a UE achega o 70%, é dicir, 210.000 euros. Os beneficiarios farán prácticas en empresas de 6 países europeos -Alemaña, Austria, Italia, Portugal, República Checa e Reino Unido- durante un período de entre 3 meses e 3 meses e medio.
Gómez Besteiro subliñou a necesidade de impulsar iniciativas que favorezan a inserción laboral dos máis novos porque son un dos sectores de poboación máis castigados polo paro. Segundo datos de xuño das oficinas públicas de emprego, lembrou, “dos 26.737 desempregados cos que terminou o mes en Lugo, o 21% son menores de 30 anos”, a taxa máis alta das catro provincias galegas.
“Un punto de inflexión no currículo”
Co Presidente estiveron dous dos mozos beneficiarios das primeiras becas medioambientais Lug02, desenvolvidas pola Deputación o pasado ano, Andrea Campillo Rey, licenciada en Publicidade e Relacións Públicas, e Wenceslao Posada Bolaño, enxeñeiro técnico industrial, que relataron a súa experiencia como becarios de Lug02 en Alemaña e animaron á xuventude lucense a participar no novo proxecto formativo da Deputación “porque é unha experiencia valiosísima para o currículo, pode supoñer un punto de inflexión”. Ámbolos dous mozos teñen a día de hoxe traballo na provincia.
Andrea Campillo instou ós xóvenes “a lanzarse a saír ó estranxeiro porque, ademais dos coñecementos teóricos, ó coñecer outra forma de traballar, outra cultura… adquires unha seguridade persoal moi valiosa de cara ó futuro, sobre todo para enfrontarte a unha entrevista de traballo”. Pola súa banda, Wenceslao Posada, indicou que proxectos como as bolsas da Deputación “alivian o risco económico ó que ós mozos que queren saír fóra teñen que enfrontarse”, ademais de resaltar a aprendizaxe de idiomas que leva consigo, “o coñecemento doutra cultura do traballo, como funcionan as empresas… en definitiva, que hai outros mundos, e a posibilidade de traer ideas para aplicalas aquí. De feito, eu teño en marcha unha iniciativa emprendedora, que pode saír ben ou non, pero tamén hai que asumir riscos para saír adiante”.
Dous tipos de becas
As 70 becas Leonardo que ofrece a Deputación son de dous tipos:
– As Lugojob, solicitadas pola propia Deputación, e que teñen 50 prazas. Están dirixidas a mozos da provincia menores de 35 anos que conten cunha titulación universitaria acadada nos últimos catro anos e que se atopen en desemprego, preferentemente sen experiencia laboral previa. As titulacións deberán estar relacionadas co medio ambiente, agroalimentación, gandeiría, pesca, informática, turismo e ciencias da vida. Os beneficiarios farán prácticas durante tres meses e medio en empresas de Hamburgo, Viena, Florencia, Lisboa, Praga, Belfast e Cork.
– As Ticlugo, xestionadas pola fundación TIC. Neste caso son 20 prazas, especificamente destinadas ós titulados da escola de imaxe e son (EIS), o único centro educativo da provincia que imparte ensinanzas de formación profesional da familia audiovisual, e que está sostida ó 100% pola Deputación. Os aspirantes a estas becas –as primeiras que ofrece a TIC no estranxeiro- teñen que ter terminado nos últimos tres anos os estudios de Produción de Radio, Audiovisuais e Espectáculos, ou de Realización de Audiovisuais e Espectáculos, na Escola de Imaxe e Son. Darase prioridade a persoas en situación de desemprego e a aquelas que non poidan acceder a este tipo de prácticas laborais no estranxeiro por razóns económicas. O período de prácticas será de tres meses en empresas de Belfast, Modena e Lisboa. Con estas bolsas, a TIC potencia as medidas de inserción laboral que xa está a desenvolver.
A Deputación de Lugo dirixe 50 das becas a universitarios para adaptarse ás condicións establecidas pola Unión Europa para os programas Leonardo, aínda así, a firme aposta do organismo provincial pola FP fixo posible ofrecer 20 bolsas nestas titulacións.
Os prazos
Hoxe mesmo a Deputación inicia unha campaña de información sobre estas bolsas de emprego, colgando na súa web www.deputacionlugo.org as súas características e os requisitos para acceder a elas, co fin de que o maior número de mozos posible teñan a posibilidade de beneficiarse delas. Na web encontrarán tamén números de teléfono e direccións de correo electrónico ós que poden dirixirse para facer consultas.
Tal e como pide a UE:
– En setembro publicaranse as bases de selección e, inmediatamente, abrirase o prazo para inscribirse
– En outubro farase o proceso de selección e publicarase a lista de admitidos e excluídos na web provincial
– En novembro tramitarase a documentación para que os mozos seleccionados poidan partir en xaneiro ó país de destino, onde recibirán formación ata finais de maio, principios de xuño.
Preto de 150 becas
Con estas 70 novas becas, “serán preto de 150 as que levamos impulsado na Deputación para abrir novas oportunidades laborais ós mozos lucenses”, destacou o Presidente. Deste xeito, ademais das de Lug02, o organismo provincial ofrece as de guías medioambientais especializados nas Reservas da Biosfera, que están agora mesmo en marcha; e desenvolveu as de innovación, pioneiras en Lugo neste sector; e as de artesanía e deseño; “o que da boa conta de que atallar a caída demográfica con emprego é a nosa prioridade número un”, afirmou Besteiro
Na iniciativa participaron arredor de 500 rapaces e rapazas de secundaria de oito institutos da Mariña. Arias destacou a posibilidade que supuxo para o alumnado poder achegarse a esta modalidade deportiva e agradeceu “a colaboración continuada que prestan neste tipo de actividades”.
Celébranse ata o mércores no CFEA Pedro Murias. O programa inclúe tamén showcookings, presentacións e interesantes charlas como a ofrecida este martes sobre a posible produción de viño na Mariña.
Unha obra contemporánea orientada a público adulto. Venda de entradas: de luns a xoves, no teléfono 982560162, en horario, de 9 a 14,00 horas, ou no correo electrónico rbg.cultura@viveiro.es, e tamén na taquilla do teatro 1 hora antes da función.
Estivo enmarcado dentro dos actos do 25N. Tamén foi unha xornada na que crearon e tiraron de imaxinación co violeta como protagonista, cor símbolo da loita contra a violencia de xénero.
O presunto autor arrincou supostamente o toldo exterior dun establecemento comercial situado neste termo municipal na madrugada do 31 de agosto. A persoa investigada e as dilixencias policiais foron remitidas á Autoridade Xudicial.
Previamente traballou no Hospital de Burela. Beatriz, ainda que orixinaria da Coruña asentouse na Mariña cando veu a traballar a Burela, onde formou a sua familia e onde finalmente se xubilou. A cea foi no Hotel restaurante Nordés, á que asistiron 60 persoas. Recibiu agasallos nos que participaron máis de 100 persoas que coincidiron con ela na Residencia de Maiores de Burela. Deixa unha enorme pegada pola sua labor profesional e humana.
A A.C. Francisco Lanza organiza este venres, 29 de novembro ás 20.30h, na Casa do Viejo Pancho, unha charla coloquio sobre a situación dos medios de comunicación e as relacións destes co poder. Estará impartida por Luis Álvarez Pousa, director da revista "Tempos Novos" e profesor na Facultade de Ciencias da Comunicación da USC. Presentará o acto, Farruco Graña, presidente da ACFL.
