Lugo, 10 de xuño de 2020. A Deputada de Réxime Interior, Promoción do Territorio e Turismo, Pilar García Porto, abriu este mércores a segunda sesión dos encontros online Abrindo as portas: o rexurdir do turismo que organiza a institución provincial no marco da campaña EN LUGO, SI, dirixida a reactivar os sectores produtivos da provincia. Nesta ocasión, o foro, que se retransmitiu en directo a través da canle de Youtube dos Servizos de Audiovisuais da Deputación, reuniu a representantes de colectivos empresariais para abordar o futuro do sector turístico e poñer en común diferentes medidas e ferramentas nun novo escenario tras a crise da covid-19.
Participaron o presidente da Asociación Galega de Albergues Privados, Miguel Ángel Rodríguez, o presidente da Asociación Galega de Axencias de Viaxes, Juan Antonio Ribadulla, o presidente da Asociación Galega de Empresas de Turismo Activo e Natureza, Agustín Rico, o presidente da Asociación Provincial de Empresarios de Hostalería de Lugo, Cheché Real e a representante da Asociación Profesional de Guías de Turismo de Galicia, Beatriz Pérez.
Todos eles valoraron a transversalidade das xornadas organizadas pola Deputación e coincidiron na importancia de manter o sector turístico unido no novo escenario que se presenta tras a fase de confinamento e coa apertura de fronteiras cada vez máis próxima. Así mesmo, constataron que están preparados para facer fronte á nova normalidade post Covid-19 e que consideran clave para a reactivación do sector a aposta pola profesionalización, as garantías sanitarias e a cooperación coas institucións para promocionar os destinos, ademais de mostrarse preocupados pola ameaza que supón o intrusismo.
A Deputada de Turismo puxo en valor o esforzo e o traballo de todos os profesionais do eido turístico e destacou que nesta crise xogaron un papel difícil e agora deberán adaptarse as novas esixencias. “A provincia de Lugo ata agora contaba con recursos que eran unha opción á hora de viaxar pero hoxe ademais, son unha oportunidade. O valor engadido de ter espazos abertos, produtos de primeira calidade van ser fortalezas dentro do noso territorio e é fundamental a acción dos profesionais. Nestes momentos tan duros non podemos esquecer que a Deputación é a casa de todos os concellos, temos claro que vamos estar aquí para botar unha man. De todo isto podemos saír se temos a capacidade de sumar e non xerar enfrontamentos”.
O presidente da Asociación Galega de Albergues Privados, Miguel Ángel Rodríguez, sinalou que este é un gran desafío para todo o sector, pero que aínda así estanse formando e preparando con todas as medidas e condicións de seguridade óptimas. “Será necesario tomar medidas extremas, establecendo aforos moi concretos e puntuais, agora mesmo non poderemos pasar do 50% de ocupación para garantir esas condicións”.
Na mesma liña falou o presidente da Asociación Galega de Axencias de Viaxes, Juan Antonio Ribadulla, que comentou que tras o primeiro mes de estado de alarma comezaron a formarse e a asistir a diferentes webminars. “Parece que o turismo interior de Galicia e España en xeral vai ser o primeiro que se recupere, as axencias estamos preparadas para volver á nosa actividade e atender aos nosos clientes”.
En canto ao turismo activo, o presidente da Asociación Galega de Empresas de Turismo Activo e Natureza, Agustín Rico, destacou o novo escenario ao que se enfronta este sector e a importancia de traballar de forma proactiva: “A capacidade de adaptación xoga un papel chave porque o escenario cambia de forma continuada. Toca enfocarse no que nos vén, toca clarificar o escenario de xogo e adaptarse de forma operativa onde as administracións e as empresas xogan un papel diferente e cada unha debe xogar o seu”.
O presidente da Asociación Provincial de Empresarios de Hostalería de Lugo, Cheché Real, agradeceu o traballo que está a realizar a Deputación para sacar adiante os diferentes sectores económicos da provincia e avanzou que “se etán elaborando, en colaboración coas administracións, protocolos e manuais para identificar as diferentes medidas a seguir, así tratamos de informarnos nós para informar aos clientes”.
Como última poñente participou a representante da Asociación Profesional de Guías de Turismo de Galicia, Beatriz Pérez, quen sinalou que os principais obxectivos deste colectivo son a formación e a visibilidade. “Queremos que a nosa profesión se vexa como unha acción integradora, todos temos as mesmas inquedanzas e preocupacións, queremos que se nos vexa como alguén aberto á colaboración. O turismo é colaborar, o sector ten as ferramentas para loitar con un montón de inconvenientes”.
Novas xornadas
Os encontros de turismo online da institución provincial terán continuidade noutras tres sesións: na xornada de mañá xoves, e os días 15 e 17 de xuño, co obxectivo de converterse nun espazo de intercambio de información, análise e debate de opinións e tamén de escoita das necesidades do sector e das súas perspectivas sobre a reactivación turística da provincia. Con esta iniciativa, a Deputación pretende facilitar ademais a adaptación con garantías a todo o que esixe a nova normalidade na actividade hostaleira e turística e compartir a visión dos retos e oportunidades que ofrece o novo escenario para o sector.
As xornadas Abrindo as portas: o rexurdir do turismo son unha das accións da campaña EN LUGO, SI que promove a institución provincial para impulsar o tecido económico provincial na desescalada. Pretenden contribuír a incorporar ferramentas e dinámicas que sirvan para reforzar os valores e fortalezas da provincia de Lugo como destino turístico e para afrontar con garantías a chegada de visitantes neste verán.
Os foros de turismo online comezan ás 11:00 horas e contan coa participación da Deputada de Turismo, Pilar García Porto.
Mañá, no diálogo con representantes de institucións, entes de xestión e promoción e sociedade civil intervirán a Alcaldesa de Lugo, Lara Méndez, o presidente do Consorcio de Turismo da Ribeira Sacra, Luis Fernández Guitián, o presidente da Federación Galega de Municipios e Provincias, Alberto Varela Paz, o presidente da Mancomunidade de Municipios da Mariña Lucense, Francisco Cajoto, a delegada da S.A. do Plan Xacobeo e Comisaria do Xacobeo 2021, Cecilia Pereira, o presidente da Federación Veciñal Lucus Augusti, Jesús Vázquez Varela, e o Presidente da Asociación Galega de Amigos do Camiño de Santiago, Manuel López Vázquez.
O luns 15 de xuño, noutro diálogo con colectivos empresariais participarán representantes da Asociación de Vivendas Turísticas de Galicia -AVITURGA-, Asociación de Balnearios de Galicia, Federación Galega de Comercio, Federación Galega de Turismo Rural e Asociación de Profesionais do Turismo de Galicia -PROTURGA-.
O mércores 17 de xuño, no debate Traballando por unha hostalería segura intervirán representantes da Asociación Provincial de Empresarios de Hostalería de Lugo -APEHL, Hostalería de España e da Horeca Data e Proyecto Hostelería Segura.
Unha obra contemporánea orientada a público adulto. Venda de entradas: de luns a xoves, no teléfono 982560162, en horario, de 9 a 14,00 horas, ou no correo electrónico rbg.cultura@viveiro.es, e tamén na taquilla do teatro 1 hora antes da función.
Estivo enmarcado dentro dos actos do 25N. Tamén foi unha xornada na que crearon e tiraron de imaxinación co violeta como protagonista, cor símbolo da loita contra a violencia de xénero.
O presunto autor arrincou supostamente o toldo exterior dun establecemento comercial situado neste termo municipal na madrugada do 31 de agosto. A persoa investigada e as dilixencias policiais foron remitidas á Autoridade Xudicial.
Previamente traballou no Hospital de Burela. Beatriz, ainda que orixinaria da Coruña asentouse na Mariña cando veu a traballar a Burela, onde formou a sua familia e onde finalmente se xubilou. A cea foi no Hotel restaurante Nordés, á que asistiron 60 persoas. Recibiu agasallos nos que participaron máis de 100 persoas que coincidiron con ela na Residencia de Maiores de Burela. Deixa unha enorme pegada pola sua labor profesional e humana.
A A.C. Francisco Lanza organiza este venres, 29 de novembro ás 20.30h, na Casa do Viejo Pancho, unha charla coloquio sobre a situación dos medios de comunicación e as relacións destes co poder. Estará impartida por Luis Álvarez Pousa, director da revista "Tempos Novos" e profesor na Facultade de Ciencias da Comunicación da USC. Presentará o acto, Farruco Graña, presidente da ACFL.
Na súa representación estivo o seu Presidente, José Veiga, apoiado pola Alcaldesa, María Loureiro, compañeiros da Xunta de Confrarías e Monseñor Fernando García Cadiñanos, Bispo de Mondoñedo-Ferrol que á súa vez contaba coa compañía do Párroco D. Xosé Ramón Escourido Basanta.
Reclamaron unha xuntanza urxente para abordar a situación da fábrica e maior implicación dos goberntos estatal e autonómico.
