A campaña comeza en Mondoñedo e continuará por Sarria, A Fonsagrada, Ribadeo, Vilalba, Becerreá e Chantada, “cun esforzo salientable tendo en conta a orografía, dispersión e envellecemento da provincia”
Lugo, 11 de abril de 2025. A subdelegada do Goberno en Lugo, Isabel Rodríguez, presentou hoxe en Mondoñedo o novo Vehículo Integral de Documentación (VIDOC) da Policía Nacional, que permitirá expedir e renovar o DNI e o pasaporte sen necesidade de desprazarse ás comisarías dos concellos máis próximos. A subdelegada destacou que “a posta en marcha desta iniciativa pioneira na provincia de Lugo é unha mostra clara do compromiso do Goberno de España coa mellora dos servizos públicos no rural, achegando a Administración á veciñanza das zonas que non contaban antes con esta posibilidade”.
Ao acto asistiron tamén o comisario xefe provincial da Policía Nacional, Luis Miguel Romera Pérez, e o alcalde de Mondoñedo, Manuel Ángel Otero Legide, acompañando á subdelegada na presentación da furgoneta na Praza do Seminario.
Este vehículo móbil, acompañado por un vehículo de apoio rotulado, comeza a súa ruta en Mondoñedo e continuará por outros seis concellos da provincia: Sarria, A Fonsagrada, Ribadeo, Vilalba, Becerreá e Chantada. A subdelegada puxo en valor esta iniciativa na provincia, cunha situación xeográfica que, xunto á orografía característica, a dispersión poboacional e o envellecemento demográfico, “supoñía un condicionante negativo para a veciñanza no acceso á tramitación presencial deste tipo de documentos”.
“Con esta iniciativa damos resposta directa ás necesidades das persoas que residen no rural, facilitando un trámite esencial como é a expedición ou renovación do DNI e o pasaporte sen ter que realizar longos desprazamentos”, salientou a subdelegada. Rodríguez puxo en valor que, grazas a este novo sistema, os documentos poderán tramitarse e entregarse no mesmo día, en apenas dez minutos, eliminando os tempos de espera que antes obrigaban a realizar varios desprazamentos ou agardar días para a súa recollida.
Tamén puxo de relevo que “achegar os servizos públicos é clave para garantir a igualdade de oportunidades, reducir a fenda territorial e contribuír ao asentamento de poboación nestes concellos”. A subdelegada incidiu así mesmo en que este tipo de iniciativas responden ao obxectivo do Goberno de construír unha Administración máis próxima e útil para todas as persoas, “vivan onde vivan”.
Ademais da tramitación do DNI e o pasaporte, este servizo contribuirá a modernizar e dixitalizar a relación da cidadanía coa Administración Pública, grazas á implantación do novo DNI electrónico e aos avances no proceso de identidade dixital, que permitirán no futuro xestionar múltiples trámites administrativos desde dispositivos móbiles con plenas garantías de seguridade.
A subdelegada concluíu lembrando que “seguimos a traballar para que, especialmente nas vilas de menor poboación, os servizos públicos cheguen nas mellores condicións e coa máxima eficacia, evitando que as distancias sexan un obstáculo para exercer dereitos básicos como a identificación persoal ou a mobilidade”.
VIDOC
O Vehículo Integral de Documentación conta co equipamento necesario para xestionar por completo o proceso de expedición dos documentos de identidade, incluíndo tamén a posibilidade de actualizar certificados dixitais do DNI a través dun Punto de Actualización de Documentación (PAD) integrado no propio vehículo. Este avance complementa os dispositivos PAD que se están a instalar en diferentes concellos da provincia, incrementando así as opcións para a cidadanía de manter ao día a súa documentación sen saír do seu entorno máis próximo.
Este servizo enmárcase no Plan de Identidade Dixital da Dirección Xeral da Policía Nacional, financiado a través dos fondos do Plan de Recuperación, Transformación e Resiliencia da Unión Europea, e supón unha modernización substancial na prestación dos servizos públicos, adaptándoos á realidade do rural galego.
Á cita asistiron tamén alcaldes da provincia, como a Alcaldesa de Vilalba Marta Rouco, a Alcaldesa de Guitiriz, Marisol Morandeira e o Alcalde de Fonsagrada, Carlos López. Na xuntanza estiveron así mesmo concelleiros e concelleiras da Terra Chá e da Mariña, así como representantes e militantes de agrupacións socialistas da provincia.
Alfonso Villares participou na foodtruck de Galicia Sabe Amar con motivo do Campionato de Marcha Atletismo, no Complexo Deportivo de A Veiga.
Foi unha noite moi fermosa e divertida no Restaurante A Chave das Noces, onde non faltou unha caricatura feita por Adri Pardo, e unhas xoias para que luza agora nesta nova etapa.
O presunto autor pretendía saír de maneira ilícita do interior dunha fábrica sita en San Cibrao-Cervo, con cinco bloques de aluminio ocultos no interior do seu vehículo. Os feitos foron detectados pola seguridade privada do complexo industrial ao redor das 06.30 horas do pasado día 8, cando o detido pretendía saír das instalacións, alertando os vixiantes á Garda civil, a cal procedeu á detención do infractor. A persoa detida foi posta ao dispor do Xulgado de Instrución un de Viveiro.
Acompañado de persoal doutras categorías xuntouse en defensa dos pacientes
Chámase Galán e xa se integrou na Asociación de Comerciantes, Industriais, Servizos e Autónomos (ACISA). Está especializada exclusivamente en moda masculina cunha coidada selección de confección, punto, roupa interior e complementos e firmas como Pertegaz, Gaea, Berto ou Birdigan.
Trátase da escultura dun cabaliño de mar realizada polo artista de Cedeira Manuel Armada Santalla, coñecido polas súas creacións a partir de materiais reciclados.
