A vicepresidenta de VÍA Alfoz, Fernanda Casabella, foi a encargada de dar lectura ao manifesto, no que se puxo en valor o camiño percorrido polas mulleres ao longo da historia na loita polos seus dereitos e tamén os desafíos que aínda quedan por superar. Destacouse a necesidade de continuar avanzando cara a unha igualdade real e efectiva, lembrando que os dereitos das mulleres son dereitos de toda a sociedade.
Durante o acto, depositáronse doce caraveis brancos, un por cada mes do ano, como símbolo da importancia de manter viva esta loita os 365 días. O branco das flores representa tamén a paz, un recordatorio de que a igualdade non debería ser unha batalla, senón unha realidade compartida por todas e todos.
Desde VÍA Alfoz queren agradecer a participación de todas as persoas que asistiron ou apoiaron este acto, reafirmando o compromiso coa igualdade e co recoñecemento do papel fundamental das mulleres en todos os ámbitos da vida.