Unha historia de loita e resistencia
Vero é a dona da Iguana Café que con tan só 21 anos abriu a súa primeira cafetería e, con 22, xa tiña dous locais en marcha. Pero o camiño non foi doado: crises económicas, a pandemia e, cando todo parecía estabilizarse, a Dana arrasou con todo, levando consigo anos de esforzo e sacrificio.
A auga subiu ata 1,70 metros dentro do establecemento, deixando neveiras flotando e destruíndo por completo a cafetería. A súa compañeira Cris, con quen leva 15 anos traballando de xeito conxunto, quedou atrapada no interior. Sen comunicación e coa auga cubríndoo todo, Vero pasou horas de angustia sen saber se a súa amiga estaba a salvo. Foi grazas aos veciños que lograron rescatala, rompendo unha parede para sacala do local asolagado.
Tony’s Burger Força Valença
Cando en Galipizza coñeceron a historia da Iguana Café, “soubemos que tiñamos que facer algo. Así naceu a Tony’s Burguer Força Valença, unha hamburguesa con identidade que, ademais de estar deliciosa, leva un ingrediente especial: a solidariedade”.
Esta hamburguesa única conta cunha salsa de alioli de alcachofa, creada en exclusiva para Galipizza pola Factoría do Lume, achegando un toque diferencial a este prato tan especial.
Cada vez que se pida a Tony’s Burguer Força Valença, contribuirase directamente á recuperación da Iguana Café. “Porque a hostalería é moito máis que comida: é esforzo, paixón e traballo, moito traballo”.
