Este plan de rehabilitación ten como obxectivo recuperar antigas vivendas municipais para poñelas a disposición da veciñanza a prezos accesibles. Segundo explicou o alcalde, Rubén García, “levamos anos traballando para recuperar e rehabilitar as antigas vivendas municipais, e seguiremos avanzando para ampliar a oferta de alugueiro social en Trabada”.
O Concello continuará con esta liña de actuación, reformando as vivendas das antigas escolas e outros inmobles municipais, co propósito de facilitar o acceso á vivenda e fixar poboación no municipio. Así mesmo, unha vez rematadas as reformas pendentes e acadada a financiación necesaria, o goberno local ten previsto ampliar este proxecto coa adquisición de novas vivendas para a súa rehabilitación e posterior oferta en alugueiro social.