O alcalde, Fran Cajoto, explica: “este luns pola tarde demos comezo á retirada do firme de formigón actual da Avenida da Mariña, que en zonas só dispón de nove centímetros de espesor, cando o proxecto marcaba 21 centímetros. A rúa foi inaugurada na época de Castiñeira, en outubro do ano 2017. Estamos a falar de pouco máis de sete anos, pero xa no 2019 se fixera unha demolición de dous tramos xusto antes do cambio de Alcaldía, entendo que para que a construtora recuperara o aval. Agora estamos a investir 148.000 euros, con cargo ao Plan Deputación 2024, para substituír o firme de formigón do carril central por aglomerado en quente, por mor dunha obra mal executada. Imos completar a sinalización e mellorar a drenaxe lonxitudinal, eliminando as rexas transversais da zona de rodadura dos vehículos. Pido desculpas polas molestias das obras, que durarán unhas poucas semanas. Seguimos traballando”.