Na reunión abordáronse, entre outros asuntos, actuacións previstas en materia de infraestruturas, como a construción dunha rotonda na intersección das estradas LU-530, LU-740 e LU-730 na entrada da localidade. Arias confirmoulle ao representante municipal que a Xunta dispón xa dun proxecto, que se licitará en próximas datas. O obxectivo desta intervención é mellorar a seguridade na intersección das citadas estradas autonómicas na Fonsagrada, que conta actualmente cunha disposición de glorieta partida.
Referíronse ademais a outros investimentos recentes do Goberno galego no municipio, como os preto de 108.000 euros destinados ao amparo do Plan Marco 2023-2024 da Consellería de Medio Rural e que permitiron acondicionar camiños rurais nos lugares de San Pedro do Río, Redrollán e Torviso, ou os máis de 50.000 euros para mellorar a cociña e o comedor do CEIP Santa María da localidade.