A Deputada de Economía, Recadación, Facenda e Especial de Contas, Carmela López, destacou que a institución provincial reforza o apoio a esta festividade relixiosa como “unha aposta clara polo seu crecemento e consolidación”
“É unha honra para a Deputación formar parte, unha vez máis, da celebración da Semana Santa de Viveiro, unha festividade que transcende as fronteiras locais para converterse nun referente cultural e espiritual recoñecido internacionalmente”, declarou a Deputada durante a súa intervención na Sala Multiusos da Casa Consistorial onde tivo lugar a presentación.
Carmela López salientou ademais que a Semana Santa de Viveiro, “non se trata só dunha tradición dos viveirenses, senón dun patrimonio compartido por toda a provincia de Lugo e por milleiros de visitantes que cada ano acoden a vivir esta experiencia única. Esta celebración mantén a súa fidelidade ás raíces, pero ao mesmo tempo, sabe reinventarse e medrar en cada edición”.
“Un modelo de turismo que promovemos dende a Deputación desde hai tempo e que pon en valor o noso patrimonio cultural, a nosa historia e o noso entorno natural, e ofrece a posibilidade de disfrutar desta tradición en familia, con nenos, maiores e con todas aquelas persoas que desexen mergullarse nesta manifestación de fe, arte e tradición”, concluiu a Deputada.
Unha tradición relixiosa recoñecida internacionalmente
A Semana Santa de Viveiro foi declarada no ano 2013 Festa de Interese Turístico Internacional, e é unha das celebracións relixiosas máis importantes e antigas de Galicia. Numerosos pasos, algúns articulados, de grande interese artístico procesionan polas rúas de Viveiro entre os que destacan o da Última Cea creado en 1808; o do Encontro acompañado das tallas da Virxe da Dolorosa, de San Juan e da Verónica; o Vía Crucis; ou a procesión da Soidade, conocida tamén como dos Caladiños que ten lugar na noite do Venres Santo acompañado de numerosos fieis con candeas encendidas no máis impresionante recollemento.