O Concello de Foz expón para consulta pública o proxecto de trazado O Carme – Barreiros da autovía A-74

Foz, 10 de febreiro de 2025. O Concello de Foz expón para consulta pública, desde o pasado venres e durante vinte días hábiles, o proxecto de trazado O Carme – Barreiros da autovía A-74. O proxecto de autovía, con dous carrís por sentido de circulación, ten unha lonxitude de 6.360 metros e un inversión prevista de 123,65 millóns de euros para a execución das obras. O orzamento contemplado para as expropiacións deste tramo da futura autovía da Mariña é de 8,35 millóns de euros.

O alcalde de Foz, Fran Cajoto, ponse a disposición de todos os veciños do concello para facilitar a información que precisen: “desde o pasado venres vimos facendo copias de planimetría e fichas descritivas das fincas expropiadas a aqueles afectados que o requiriron. As fincas expropiadas corresponden principalmente aos barrios da Baesta, en Vilaronte, e o Carme, en San Martiño, así como os montes entre estas dúas zonas ata chegar ao río Masma, atravesado cun viaduto augas arriba da Finca A Goleta”.