A Xunta fomenta desde O Valadouro o envellecemento saudable das persoas maiores que viven no rural

O director xeral de Maiores e Atención Sociosanitaria, Antón Acevedo, acompañado do delegado territorial da Xunta en Lugo, Javier Arias, presentou hoxe un novo programa de actividades no centro sociocomunitario do Valadouro

O Valadouro, 3 de febreiro de 2025. O director xeral de Maiores e Atención Sociosanitaria, Antón Acevedo, indicou hoxe que a Xunta de Galicia traballa da man dos concellos e das entidades para que as persoas que viven no rural teñan a posibilidade de envellecer na súa contorna cos coidados e apoios que necesitan. Díxoo na presentación do novo programa de atención aos maiores e envellecemento saudable que ten como sede principal das súas actividades o centro sociocomunitario de Ferreira de Valadouro. O acto contou tamén coa presencia do delegado territorial da Xunta en Lugo, Javier Arias.

Ademais dos beneficios para a saúde que ten este tipo de programas que a Xunta promove en concellos de toda Galicia, Antón Acevedo salientou que axudan a combater a soidade no desexada, xa que, a través deles, tamén se comparten experiencias e fomentan as relacións persoais. Neste sentido, apuntou que do que se trata é de mellorar a calidade de vida e o benestar das persoas que participan nas actividades.

O centro sociocomunitario de O Valadouro funciona como un espazo polivalente, no que a veciñanza participa en talleres de estimulación da memoria, aprende a manexar un teléfono móbil ou unha tablet e asiste a conferencias e charlas divulgativas, entre outras propostas. As persoas interesadas en anotarse no programa deben poñerse en contacto cos servizos sociais do concello do Valadouro.