A Xunta de Goberno aprobou este venres as bases das convocatorias de axudas para asociacións, dirixidas ao desenvolvemento de actividades culturais e á mellora dos locais
A Xunta de Goberno provincial aprobou este venres as bases destas liñas de axuda, unha destinada á organización de actividades de dinamización cultural, dotada con 315.000 euros, e outra dirixida a financiar investimentos en instalacións e equipamento nos seus locais sociais, de 185.000 euros.
A deputada de Cultura Iria Castro sinalou que “con esta ampliación do orzamento, pretendemos atender o crecente interese por esta convocatoria, despois do incremento de solicitudes da ultima anualidade, unha demanda que valoramos como mostra do dinamismo do asociacionismo cultural”
Nesa liña, indicou que a maioría dos colectivos beneficiarios destas liñas de axuda son pequenas asociacións de parroquias e concellos, nos que actúan como referentes culturais, programando actividades pero tamén impulsando estudos, investigacións e iniciativas de posta en valor do patrimonio local”
A convocatoria de subvencións publicarase no Boletín Oficial da Provincia nos vindeiros días, abríndose daquela o prazo de solicitude para as entidades interesadas. As bases e os modelos de solicitude estarán dispoñibles tamén na web da Deputación de Lugo.