Os actos de conmemoración do cabodano de Cunqueiro comezarán ás 11:00h no Cemiterio Vello, onde terá lugar a Ofrenda Floral diante da tumba do autor. Está previsto que asistan á mesma autoridades locais, provinciais e autonómicas, así como familiares de Álvaro Cunqueiro, intelectuais da cidade e unha representación da Editorial Galaxia. Nesta mesma visita, e como xa é tradición, tamén se depositará unha rosa vermella na tumba de Manuel Leiras Pulpeiro, outro dos grandes próceres literarios mindonienses.
A seguir, a comitiva trasladarase ao Salón de Plenos do Concello, onde se celebrará a cerimonia de entrega da distinción de entidade Cunqueiriana de Honra á Editorial Galaxia. Alí tomará a palabra en primeiro lugar, en nome da comisión responsable da distinción, o coordinador de Actividades e Publicacións da Casa Museo Álvaro Cunqueiro, Armando Requeixo. Acto seguido será César Cunqueiro, fillo do insigne escritor mindoniense. quen intervirá e fará a laudatio da institución homenaxeada. Inmediatamente despois, o representante da Editorial Galaxia pronunciará o seu discurso de recepción e o acto rematará coa intervención das autoridades e da presidencia, amais de coa lectura pública dunha obra de Cunqueiro, que iniciará a entidade distinguida e continuarán logo outras persoas asistentes.
Todos os actos deste día son públicos e abertos a quen queira achegarse a homenaxear o noso ilustre D. Álvaro Cunqueiro.
O Concello de Mondoñedo e a Casa Museo Álvaro Cunqueiro, organizadores do evento, convidan ao seu medio a asistir e agradecen a difusión da nova.