A rexedora úrxelle á Xunta de Galicia “unha solución dunha vez por todas, tanto para esta situación como para os problemas que se veñen arrastrando durante catro meses no transporte escolar e integrado do noso municipio”
Ademais, a rexedora vilalbesa, Marta Rouco, explica que “a esta situación súmanse graves incidencias no transporte escolar e integrado do noso municipio que se veñen arrastrando catro meses e coas que as familias teñen que lidar cada día”.
O pasado mes de novembro, un mes despois de que a directora xeral de mobilidade da Xunta de Galicia, Judit Fontela, visitara a estación de autobuses de Vilalba, a alcaldesa Marta Rouco, solicitou unha reunión coa mesma “á maior brevidade posible, para abordar cuestións que son fundamentais para o noso Concello e os nosos veciños e veciñas”.
Non obstante, dous meses despois desa solicitude e tres meses dende que a directora de mobilidade se comprometera a estudar a situación da estación de autobuses e as dúas propostas posibles para desbloquear a situación, a alcaldesa de Vilalba, Marta Rouco, asegura que “non obtiven ningún tipo de resposta nin solución ao respecto, así como tampouco recibimos resposta á problemática do transporte escolar e integrado no noso municipio”.
Nesa liña, Rouco lembra que “o que lle propuxen á directora xeral de mobilidade foi manter as dársenas actuais, de forma que todas as empresas de autobuses acudan a elas para deixar e recoller pasaxeiros, instalar nesa mesma zona unha infraestrutura que permita aos viaxeiros resgardarse mentres agardan e habilitar un acceso aos baños”.
Ademais, para a rexedora, Marta Rouco, “é fundamental que se instale algún panel informativo coas rutas e os horarios e acondicionar a contorna”. Pola súa banda, dende a dirección xeral de Mobilidade propoñían instalar unha dársena nas inmediacións da estación, o que suporía o peche definitivo do recinto.
“Sexa unha fórmula ou outra, e agardando que se teña en conta a gran importancia do transporte público para un concello das nosas características, capitalidade de comarca e polo que pasan gran parte das rutas que discorren pola provincia, precisamos unha solución xa”, sinalou a alcaldesa de Vilalba, para quen “é moi indignante que levemos quince meses con esta situación e que a Xunta de Galicia siga na súa de castigar a Vilalba e aos vilalbeses e vilalbesas desta maneira”.
TRANSPORTE ESCOLAR E INTEGRADO
Pola súa banda, os problemas no transporte integrado do municipio seguen centrándose nas parroquias de San Simón, Vilapedre e Lanzós, nas que hai familias con mozos matriculados en bacharelato e ciclos de Formación Profesional que se vén na obriga de desprazarse cada día ata Vilalba para deixar e recoller aos seus fillos dos centros educativos.
“Unha situación que deriva da pésima xestión do transporte integrado que fai a Xunta de Galicia, quen semella que o emprega como propaganda política pero non como unha realidade para dotar ao rural de servizos de calidade”, asegura a alcaldesa de Vilalba, Marta Rouco.
Rouco explica que “defendo esta postura porque a Xunta o demostra nos pregos que rexen o servizo de transporte integrado na nosa comunidade, nos que estableceu que só se ten que ofrecer unha praza máis do número de alumnado matriculado en cursos de educación obrigatoria”. “Unha praza que ademais queda a disposición de calquera usuario que queira empregala, sen necesidade de que sexa un alumno dun centro educativo”, engade a rexedora.
Estas condicións fan que en itinerarios como o de Lanzós, no que hai un vehículo de oito prazas, do cal seis están ocupadas por alumnado da ESO, outros catro alumnos de bacharelato e FP queden sen servizo e dous poidan empregalo grazas a que a súa parada está situada no comezo da ruta. O que tampouco lles asegura que cando rematen as clases poidan volver á casa no transporte, pois serán os dous primeiros en subirse os que consigan a praza para poder volver á casa.
No caso do transporte escolar “a situación é límite, pois estamos a falar de nenos e nenas que teñen dereito ao transporte escolar e que se lles está negando”, sinala Marta Rouco.
En concreto, a situación afecta ao alumnado do CEIP Terra Chá de Román, para o cal a Xunta de Galicia habilitou unha ruta de transporte co obxectivo de incrementar as matrículas nese centro educativo. Non obstante, autorizáronse máis prazas das que ten o autobús que fai ese itinerario, o que obrigou a algunhas familias a renunciar a ese servizo “porque senón había días nos que se presentaban máis nenos a agardar polo autobús que prazas tiña o vehículo”, explica Rouco.
“Pero iso non é todo, tamén no mes de novembro fíxenlles chegar a situación dunha familia dun neno de 3 anos que se ve obrigada a esperar o autobús na beiravía da estrada e que continúan nesta situación meses despois de que se lles dera a coñecer a situación e se solicitara unha solución urxente”, concluíu a alcaldesa de Vilalba.