Malaguti adelantou aos mariñanos na primeira metade cunha gran definición e sentenciou Isma tras un roubo e un gol dende o centro do campo
Burela, 19 de novembro, 2024. O Pescados Rubén Burela continúa co seu gran rendemento en Vista Alegre e este martes asinaba a súa segunda vitoria da tempada nun encontro no que tirou de solidez defensiva ante un CA Osasuna Magna que gozou de máis ocasións, pero estrelouse ante a zaga mariñá e o meta internacional polaco Kaluza, que lograron asinar a primeira portería a cero do seu regreso a Primeira División. Con estes tres puntos, os burelistas igualan cos pamploneses na táboa e colócanse momentaneamente na décima praza.
O primeiro tempo entre mariñáns e navarros estivo moi entretido, con boas oportunidades para ambas escuadras, pero os locais tiveron un punto máis de eficacia e fóronse ao descanso por diante grazas a un tanto de Malaguti, nunha gran definición ante Asier Llamas. O primeiros cinco minutos foron unha simple toma de contacto, cos visitantes máis presentes en campo contrario, pero sen verticalidade ningunha por parte dos dous conxuntos. Os primeiros en animarse foron precisamente os pamploneses, cun lanzamento dende a dereita de Ion Cerviño que sacaba con apuros Kaluza. Despois era Dani Saldise o que remataba ao lateral da rede nun balón que se atopaba despois dunha indecisión entre Alberto e o meta polaco.
O cadro burelista respondeu a estes dous primeiros intentos do Xota cunha gran volea de Rikelme á saída dun córner que a punto estivo de coarse entre as pernas do meta navarro. Posteriormente volvía á carga o cadro visitante cun lanzamento dende fóra do ucraíno Korsun ao que respondía Kaluza cun bo pé abaixo.
Unha vez superado o primeiro tempo, o cadro burelense volvía xerar perigo a través do balón parado e dispoñía dunha tripla ocasión. Na primeira Charly remataba de volea e Asier Llamas tiña que responder con axilidade logo de que o balón golpease nun compañeiro, xerando un novo saque de esquina no que Malaguti o probaba dende fóra da área e íase rozando o pau tras tocar nun xogador visitante. O terceiro córner seguido finalizaba cun remate de Charly no corazón da área que sacaba o conxunto navarro con moitos apuros.
Eran os mellores minutos dos locais e no 13 tentábao Juninho noutra acción de estratexia, pero o seu remate pegaba na cruceta. Non perdoaría na seguinte Malaguti. O benaventano roubáballe o coiro a Ligeiro en campo propio, nunha acción na que os pamploneses reclamaron falta, e plantábase só ante Asier Llamas e batíao con calidade por baixo dun brazo.
Tras o tanto, o CA Osasuna Magna foise á carga en busca do empate no últimos catro minutos. A primeira gran ocasión tívoa Ion Cerviño nun bo balón filtrado ás costas da defensa burelista, pero o seu remate íase lixeiramente desviado. Posteriormente era Ligeiro o que o tentaba cun disparo afastado no que tiña que voar Kaluza para deter un balón que tomaba a dirección dunha das escuadras da súa portería.
No último minuto tiña unha oportunidade cada equipo. Rikelme, nun gran xiro facendo os labores de pivote, remataba abaixo e o seu disparo era despexado cos pés por Asier Llamas. A última da primeira parte era para Geraghty nun contragolpe, pero Kaluza facíase enorme para evitar o empate visitante. No inicio da acción, os locais pediran penalti sobre Alberto.
O segundo período foi un gran exercicio de resistencia do Pescados Rubén Burela FS, que se soubo defender moi ben apoiado noutra gran actuación de Kaluza e aproveitou un erro rival, ou a intelixencia do capitán Isma, para anotar o segundo tanto a menos de dous minutos da conclusión e quedar cos tres puntos.
Comezaron os segundos 20 minutos con tres córneres seguidos para o cadro mariñán, no que os laranxas estiveron preto do segundo. No primeiro despexaba Asier Llamas un lanzamento de Charly dende fóra da área, o coruñés tentábao de novo no segundo e o terceiro era un remate de Malaguti que tocaba nun defensa navarro e íase de novo rozando un dos paus da meta verde.
A partir de aí pausouse o partido durante cinco minutos e non volvería rexistrarse unha ocasión clara ata o 26, cando Pitero, á media volta, cruzaba demasiado de primeiras ante Asier Llamas. Foi un pequeno respiro durante o maior dominio dos navarros neste terceiro cuarto de partido, aínda que sen poñer en demasiados apretos aos locais. Kaluza interviña no 27 nunha falta de Ion Cerviño e xa superado o ecuador, Rikelme remataba moi desviado tras unha gran parede de Isma.
Nos dez minutos definitivos asediaron os navarros o marco galego, pero de novo volveu aparecer Kaluza. O internacional polaco metía o peito nun remate de Pachu, provocando unha contra que finalizaba Rikelme e tapaba moi ben o meta visitante. Dous minutos máis tarde, Kaluza sacaba un balón de Geraghty que se ía á escuadra tras unha xogada de estratexia.
A pouco máis de catro minutos do final, o CA Osasuna Magna apostaba polo arxentino Geraghty como porteiro-xogador e tiveron o empate nun bo movemento ao segundo pau que, en boca de gol, non era capaz de rematar Korsun e chegaba posteriormente Kaluza para apropiarse da pelota.
Isma, sendo o máis listo da clase, roubáballe o balón a Geraghty tras un saque de córner visitante e marcaba a porta baleira superando a Ligeiro cunha vaselina cando xa restaban menos de dous minutos para a conclusión. Os navarros, con pouco máis dun minuto por xogar, xa non volveron inquietar a Kaluza e a afección local celebraba o triunfo cos Pícaros.
Ficha Técnica Pescados Rubén Burela FS 2-0 CA Osasuna Magna
Pescados Rubén Burela FS (2): Kaluza; Isma, Alberto, Rikelme, Malaguti -quinteto inicial-, Charly, Juninho, Araya, Pitero e Quelle.
CA Osasuna Magna Xota (0): Asier Llamas; Roberto Martil, Dani Saldise, Pachu, Korsun -quinteto inicial-, Tony, Ion Cerviño, Geraghty, Ligeiro e Kokoro.
Goles: 1-0, min. 14: Malaguti. 2-0, min. 38: Isma.
Árbitros: Francisco Javier Marazuela Hernando e Sergio Toral Heredia (Colexio de Castilla e León). Amonestaron ao técnico local, David Rial, así coma Alberto, Isma e Pitero. Tamén viron a tarxeta os visitantes Geraghty e Ligeiro.
Incidencias: Encontro da sétima xornada desputada no pavillón de Vista Alegre ante uns 800 espectadores.
Destacou a súa importancia para preservar a memoria histórica e recoñecer o esforzo das xeracións que converteron o porto de Celeiro nun referente pesqueiro. Puxo en valor o rico patrimonio mariñeiro e cultural da Mariña, facendo fincapé “que esta exposición é unha oportunidade para recoñecer o esforzo e a dedicación das persoas que ao longo de cen anos contribuíron ao crecemento e consolidación do porto celeirense”. A mostra, situada na sede da confraría, inclúe maquetas de barcos, fotografías, vídeos históricos, pinturas dos patróns maiores e obxectos singulares como a acta fundacional e maquinaria antiga. A visita complétase cun percorrido por espazos emblemáticos como a lonxa e o porto. Os actos do centenario culminarán coas XXVIII Xornadas Técnicas de Difusión do Sector Pesqueiro, un referente anual do sector.
Este evento anual destaca pola súa coidada selección musical e por ofrecer unha experiencia única na localidade lucense de Vilalba. Tras o éxito da pasada edición, que superou os 6.000 asistentes e contou con actuacións destacadas como as de Iván Ferreiro, Dorian e El Columpio Asesino, o FIV segue apostando por grandes nomes do indie nacional. As primeiras confirmacións do cartel serán anunciadas nas vindeiras semanas, mantendo a emoción e as expectativas para esta nova cita.
Nesta actuación, que serve de antesala para conmemorar o 25N, Día Internacional da Eliminación da Violencia contra a Muller, a coñecida maga realiza unha defensa da igualdade a través da maxia. O espectáculo é para todos os públicos e celebrarase na Casa dá Cultura de Cariño a partir das 18:30 horas. Conta con entrada libre e gratuíta ata completar aforo, polo que todos os interesados poderán acudir sen ter que realizar unha reserva previa.
Foi recibido no Concello polo alcalde, Dani Vega quen explicou que “dentro das visitas que estamos tendo en Ribadeo, recibimos ao Comandante Naval da Coruña e de Ferrol, o capitán de Fragata Javier García, que nos expuxo todo o tipo de propostas e de colaboracións que vamos ter con eles. E desde logo parécenos unha proposta interesante para tamén ter unha relación cos institutos, cos centros educativos e tamén co traballo que realiza en toda esta zona, desde Ribadeo ata A Coruña”. Vega engadiu: “nosoutros dentro da colaboración que estamos tendo con todas as administracións, creo que é positivo seguir nesta liña”.
Realizouse en dúas sesións, unha teórica e outra práctica. Na práctica contouse coa colaboración dos mestres Eloy Roces, Félix Bargados, Ángel Areas, Francisco Martins e Lino Gómez Feito. Nel actualizou a súa titulación de Xuíz de Tribunal Nacional de Graos o profesor do Club Shitokai Asturias Galicia, Julián Martín. Pola tarde celebrouse o exame de Cinto Negro ata 8º Dan. Os karatekas pertencentes ao Club de Karate de Ribadeo obtiveron os seguintes graos: Miguel Sanz Delgado, Cinto Negro 2º Dan. Janet Villarino Vizoso, Cinto Negro 1º Dan. Ambos coa idade mínima no seu Grao.
O Deputado de Medio Ambiente, Carlos López, participou no encontro, que serviu para perfilar os detalles da XLI edición deste certame, que terá lugar do 4 ao 6 de abril.
