Trátase, en concreto, do parque Restelo, que prevé a instalación de 6 aeroxeradores de 200 metros de altura nos concellos lucenses de Navia de Suarna, Baleira, Becerreá e A Fonsagrada. Está promovido por Greenalia Wind Power e foi deseñado para fornecer o complexo industrial de Alcoa San Cibrao. Todo apunta a que se trata dun novo caso de fragmentación artificial dun único proxecto eólico -Restelo, xunto con Monteiro e Pena do Pico, moi próximos e que comparten liña de evacuación-, artellado coa finalidade de minimizar os impactos do proxecto no procedemento de avaliación ambiental, o que podería tratarse dunha fraude de lei.
Para poder contribuír a este novo desafío #TPP, ADEGA acaba de facer pública a seguinte plataforma online de crowdfunding: https://tipodesparalos.helpbysc.com/restelo. Ademais, a pasada semana a organización tamén puxo en marcha a campaña de recadación solidaria para procurar frear o proxecto eólico Monteiro, fragmentación de Restelo, que pode consultarse na seguinte ligazón: https://tipodesparalos.helpbysc.com/monteiro.
Proxectado a escasos quilómetros da ZEC Ancares-Courel
O proxecto eólico Restelo sitúase nas montañas das comarcas dos Ancares e da Fonsagrada. Emprazaríase a escasos 5,5 km da ZEC Ancares-Courel e a menos de 2 km da zona proposta para integrar a ampliación da Rede Natura 2000 (concretamente, do novo LIC Serra de Foncuberta -ES1120020-), presentada pola Xunta en 2008. As instalacións deste polígono eólico situaríanse maioritariamente dentro da Reserva da biosfera Río Eo, Oscos e Terras de Burón (zona de transición), e a súa liña de evacuación, conxunta co PE Monteiro, atinxiría tamén á zona tampón desta área.
Ademais, a zona de actuación do proxecto sitúase a 6 km ao oeste dunha área con presenza da aguia real (Aquila chrysaetos) e a 10 km da área prioritaria para dita especie, que se atopa en perigo de extinción. Cómpre sinalar tamén a posible presenza de oso pardo cantábrico (Ursus arctos) na zona de implantación deste proxecto. No verán de 2024 rexistrouse a presenza dun macho adulto dentro do territorio ocupado pola poligonal do parque eólico Monteiro, contiguo a Restelo. Hai tamén avistamentos de osas con crías cara ao Norte, polo que este parque, xunto co de Monteiro e os contiguos dos Ancares (Serra do Colmo, Serra de Piñeira, Chao do Marco, Serra do Furco e Reboiro), poderían estar localizados nunha área de presenza e expansión da especie.
Obxectivos de recadación
O obxectivo mínimo de recadación colectiva establecido por ADEGA para este desafío é de 6.800 euros. Esta recadación establécese en dúas fases. A primeira terá unha duración de 1 mes desde este luns, 25 de novembro, e nela será preciso acadar un mínimo de 3.400 euros, o que garantirá a presentación por parte de ADEGA do pertinente recurso administrativo de alzada e a elaboración do informe técnico ambiental, alén de poder cubrir outros gastos de xestión. Nunha segunda fase procurarase acadar a metade restante, para a interposición do recurso contencioso-administrativo no Tribunal Superior de Xustiza de Galiza, así como para a solicitude de paralización cautelar.
Éxitos logrados
A campaña de recadación solidaria #TiPodesParalos converteuse xa na iniciativa máis exitosa de todas as campañas de micromecenado que se teñen lanzado en Galiza con fins de defensa ambiental, tanto pola envergadura dos fondos recadados (preto de 200.000 no ano 2023) como polo número de achegas (con máis de 2.000 colectivos, asociacións e persoas particulares involucradas).
Ademais, os éxitos logrados ata o momento nos tribunais acreditan o traballo desenvolvido en defensa do medio ambiente e do rural no marco desta campaña. Son xa unha vintena os proxectos eólicos paralizados cautelarmente por parte do Tribunal Superior de Xustiza de Galiza a instancias de ADEGA, grazas á masiva solidariedade da cidadanía e de plataformas veciñais que achegaron o seu gran de area para custear a presentación dos correspondentes recursos e a solicitude de paralización cautelar de máis dunha trintena de proxectos eólicos.
Agora, ADEGA lanza esta nova campaña #TiPodesParalos co obxectivo de acadar a anulación, primeiro cautelar e logo definitiva, do P.E. Restelo ante a Xustiza. A organización ecoloxista agradece todo o apoio recibido ata o momento e pide a colaboración para conseguir un fito máis na defensa dos montes e das xentes da Fonsagrada e dos Ancares fronte á vaga eólica.