Iria Castro reuniuse con representantes da entidade ribadense para concretar a colaboración de cara ao vindeiro ano
Iria Castro adiantou que a entidade provincial tramitará unha achega de 23.000 euros para “colaborar con ACISA na organización de actividades para a décima edición deste evento, que desde a súa posta en macha contribuíu de forma decisiva a poñer en valor o patrimonio arquitectónico e cultural de Ribadeo a partir do legado da emigración a América”
A responsábel provincial explicou que “a través desta colaboración con ACISA mantemos o apoio ao Ribadeo Indiano e recoñecemos a contribución que o tecido empresarial e social de Ribadeo fixo ao longo destes anos para posicionar esta cita como un das celebracións máis singulares en Galiza e das máis participadas pola veciñanza e polos visitantes”.
Iria Castro subliñou “a vontade de seguir contribuíndo á organización do Ribadeo Indiano desde a área de Cultura, salvando a falta de colaboración institucional por parte do Concello de Ribadeo, empeñado en confrontar coa Deputación de Lugo en todos os ámbitos, tanto en reunións e actos institucionais como no incumprimento das obrigas recollidas nos convenios entre ambas administracións”.
A subvención a ACISA destinarase a traballos de ambientación e de recreación histórica nas rúas e nos locais de hostelería e comercio de Ribadeo e á organización de diferentes actividades relacionadas coa cultura indiana.