O cadro mariñao entrou por diante nos últimos cinco minutos e sentenciou cando os visitantes apostaron por sacar o porteiro-xogador
Burela, 26 de outubro, 2024. O conxunto masculino do Pescados Rubén Burela sumou a súa primeira vitoria da tempada nun encontro no que o gran protagonista foi o porteiro internacional polaco Michal Kaluza, que completou unha grandísima actuación baixo paus e anotou dous tantos desde a súa propia portería para sentenciar o choque ante o ATP Iluminación Tudelano Ribera Navarra: 3-1.
Entraron algo mellor no encontro os visitantes, que foron os primeiros en xerar perigo sobre a portería contraria cun disparo afastado de Lucas Trípodi, que resolvía sen problemas Kaluza, e un contragolpe de Gabi que finalizaba cun tiro demasiado cruzado. No minuto 7 respondían os burelistas cun cabezazo de Pitero, que se adiantaba ao meta visitante na súa saída pero o seu remate íase moi elevado. Posteriormente, Kaluza despexaba con apuros un remate de Dani Fernández.
O único tanto da primeira metade chegaba a piques de superar o ecuador da mesma, nunha acción na que Malaguti remataba sobre a meta de Raúl Jiménez, pero o seu envío tocaba nun defensa e quedáballe franca a Charly para fusilar a portería visitante cunha boa volea.
O gol espoleou ao Ribera Navarra, que practicamente engarrafou ao conxunto mariñao no seu campo durante cinco minutos. Primeiro buscou o empate Lucas Trípodi nunha acción de estratexia, pero o seu disparo foise rozando a cruceta. Malaguti, nun bo xiro de pívot, finalizaba cun tiro algo desviado e despois era Alberto Lahuerta o que dispoñía de ata tres ocasiones para perforar a meta laranxa. Na primeira resolvía moi ben o man a man Kaluza e na terceira de novo o polaco facíase grande para evitar o tanto do navarro, que entremedias se atopaba cun pau da meta local.
Rikelme, nunha acción individual na que se desfacía de Gabi, tiña o segundo para os Pícaros, pero Raúl Jiménez interpoñíase e de novo volvía o acoso dos visitantes cun disparo desde o costado esquerdo de Lucas Trípodi. Antes do descanso, Malaguti remataba desviado tras unha boa combinación con Rikelme e Isma non aproveitaba un balón morto ante Raúl Jimémez, que volvía taponar sendo salvador para o seu equipo.
O segundo tempo comezou cunha gran volea de Rikelme á saída dun córner que se ía por moi pouco. No 25 e no 26 volvía aparecer Kaluza en dous disparos de Lucas Trípodi e Marc Campás. Respondía para os mariñaos Pitero, que se viraba moi ben no pivote pero o seu remate sacábao cun bo pé Raúl Jiménez.
O partido baixou un pouco de revolucións ata que se entrou no último cuarto. Xa ahí Malaguti atopábase co pau despois de baixar moi ben un balón co peito e posteriormente era o ribero Éric Perez o que tería a mellor ocasión para o seu equipo neste segundo período. O de Badalona atopábase cun balón dentro da área, remataba sen pensalo de tacón e Kaluza demostraba uns grandes reflexos para aparecer milagrosamente e sacar o balón a córner.
Os burelistas tiveron o segundo no minuto 35, pero o chileno Araya non lograba chegar ao segundo pau para finalizar un bo contraataque guiado polo brasileiro Rikelme. Con 5 minutos e 13 segundos por disputarse, Álvaro Cordón, ‘Cone’, apostaba polo xogo de cinco con Joselito portando a camiseta de porteiro-xogador. E aí emerxía de novo a figura colosal de Kaluza, que non só se limitou a parar hoxe, senón que tamén anotou un dobrete con dous lanzamentos idénticos desde a súa propia área. Co 3-0 no tenteador e Vista Alegre celebrando xa a primeira vitoria do curso, os tudelanos anotaban o tanto da honra por mediación de João Batista cando xa se disputaba o último minuto de xogo.
Ficha Técnica Pescados Rubén Burela FS 3-1 ATP Iluminación Tudelano Ribera Navarra
Pescados Rubén Burela FS (3): Kaluza; Araya, Isma, Rikelme, Malaguti -quinteto inicial-, Alberto, Quelle, Pitero, Charly e Juninho.
ATP Iluminación Tudelano Ribera Navarra (1): Raúl Jiménez; David, Lucas Tripodi, João Batista, Éric Pérez -quinteto inicial-, Gabi, Sepe, Alberto Lahuerta, Darrieer, Dani Fernández, Joselito e Marc Campás.
Goles: 1-0, min. 9: Charly. 2-0, min. 36: Kaluza. 3-0, min. 38: Kaluza. 3-1, min. 40: João BatistaÁrbitros: Antonio Jesús García (Colexio Andaluz) e Eder Gómez de Salazar (Colexio Vasco). Amoestaron ao local Quelle e ao visitante Éric Pérez.
Incidencias: Encontro da terceira xornada da Primeira División masculina disputado no pavillón de Vista Alegre diante duns 1.000 espectadores.
Esta familia naceu arredor de cinco irmáns: Paco, Esperanza, Toñito, Juan José (Sé) e Joaquín. Tocoulles vivir tempos difíciles na xuventude, véndose obrigados algúns deles a emigrar. Na reunión estiveron presentes os tres que se ven na foto: Esperanza, Sé e Joaquín, xunto con fillos, sobriños, etc. Unha reunión entrañable, porque había bastante tempo que a familia non se reunía.
A Garda Civil imputa en calidade de investigada a unha veciña de San Miguel de Reinante de 38 anos de idade como suposta autora dun delito de simulación de delito. A persoa investigada denuncio en dependencias oficiais dous cargos indebidos na súa conta bancaria. Iniciouse entón unha investigación policial comprobando documentalmente que os cargos se corresponden con dúas cotas dun préstamo ao consumo contratado pola investigada e ingresado na súa propia conta. Supostamente a persoa investigada pretendía que a entidade bancaria devolvéselle os importes das cotas domiciliadas tras formular a denuncia ante a Garda Civil. As dilixencias policiais foron remitidas á Autoridade Xudicial
Destacou a súa importancia para preservar a memoria histórica e recoñecer o esforzo das xeracións que converteron o porto de Celeiro nun referente pesqueiro. Puxo en valor o rico patrimonio mariñeiro e cultural da Mariña, facendo fincapé “que esta exposición é unha oportunidade para recoñecer o esforzo e a dedicación das persoas que ao longo de cen anos contribuíron ao crecemento e consolidación do porto celeirense”. A mostra, situada na sede da confraría, inclúe maquetas de barcos, fotografías, vídeos históricos, pinturas dos patróns maiores e obxectos singulares como a acta fundacional e maquinaria antiga. A visita complétase cun percorrido por espazos emblemáticos como a lonxa e o porto. Os actos do centenario culminarán coas XXVIII Xornadas Técnicas de Difusión do Sector Pesqueiro, un referente anual do sector.
Este evento anual destaca pola súa coidada selección musical e por ofrecer unha experiencia única na localidade lucense de Vilalba. Tras o éxito da pasada edición, que superou os 6.000 asistentes e contou con actuacións destacadas como as de Iván Ferreiro, Dorian e El Columpio Asesino, o FIV segue apostando por grandes nomes do indie nacional. As primeiras confirmacións do cartel serán anunciadas nas vindeiras semanas, mantendo a emoción e as expectativas para esta nova cita.
Nesta actuación, que serve de antesala para conmemorar o 25N, Día Internacional da Eliminación da Violencia contra a Muller, a coñecida maga realiza unha defensa da igualdade a través da maxia. O espectáculo é para todos os públicos e celebrarase na Casa dá Cultura de Cariño a partir das 18:30 horas. Conta con entrada libre e gratuíta ata completar aforo, polo que todos os interesados poderán acudir sen ter que realizar unha reserva previa.
Foi recibido no Concello polo alcalde, Dani Vega quen explicou que “dentro das visitas que estamos tendo en Ribadeo, recibimos ao Comandante Naval da Coruña e de Ferrol, o capitán de Fragata Javier García, que nos expuxo todo o tipo de propostas e de colaboracións que vamos ter con eles. E desde logo parécenos unha proposta interesante para tamén ter unha relación cos institutos, cos centros educativos e tamén co traballo que realiza en toda esta zona, desde Ribadeo ata A Coruña”. Vega engadiu: “nosoutros dentro da colaboración que estamos tendo con todas as administracións, creo que é positivo seguir nesta liña”.
