O Concello de Foz está a executar obras de melloras en tres camiños de Mañente

Foz, 16 de outubro de 2024. O Concello de Foz está a executar obras de mellora en tres camiños do barrio de Mañente, na parroquia de Vilaronte. As obras, orzamentadas en algo máis de 50.000 euros, están financiadas polo Fondo Europeo Agrícola de Desenvolvemento Rural (Feader) nun 62 por cento, o Concello de Foz nun 17,4%, a Xunta de Galicia nun 14,5% e o Ministerio de Agricultura nun 6,2 por cento.

O alcalde, Fran Cajoto, explica que “as obras consisten na limpeza de cunetas e foxos e na mellora do firme cun dobre tratamento superficial de rega asfáltica, complementado con pedra macadam naqueles puntos que fose necesario. Estamos mellorando o acceso á praia de Fondás, así como dous viais que conectan a estrada N-642 co núcleo de Mañente e que estaban en moi mal estado de conservación, no entorno dos invernadoiros. Seguimos investindo na adecuación da rede viaria do noso Concello”.