A Federación Provincial de Confrarías de Pescadores de Lugo organiza esta nova cita, que se celebra no Hotel Nordés de Burela o luns 28 e martes 29 de outubro, para reflexionar sobre temas de interese das frotas artesanais, analizar a súa situación actual e os principais retos de futuro.
Durante a tarde do luns os representantes das federacións de confrarías manterán unha Xornada Técnica onde se fará unha revisión das conclusións da última Interfederativa, que se celebrou en Ribadeo hai un ano, e abordaranse as actuais e principais preocupacións do sector.
O Congreso pecharase na mañá do martes con unha xornada de traballo conxunta entre representantes das confrarías e das administracións pesqueiras de España e das comunidades autónomas do cantábrico. Esta sesión contará coa asistencia da secretaria xeral de pesca do Ministerio de Agricultura, Pesca e Alimentación, Isabel Artime García; e na mesma, como é habitual, o sector exporá á Administración as principais conclusións derivadas do traballo do día anterior.
Seguendo o mesmo formato de anos anteriores, a partir das 12:30h celebrarase o acto de clausura e conclusións do congreso, que estará aberto á prensa e ao que se unirán representantes municipais de Burela e das organizacións de pesca da provincia, como Armadores de Burela, Porto de Celeiro, OPP-7 do Porto de Burela e OPP-77; ademais de outras entidades pesqueiras e económicas de ámbito local.