O espazo da institución provincial neste evento ofrece cada día especialidades e produtos de diferentes concellos como butelo da Fonsagrada, pan de Antas de Ulla, fabas de Lourenzá con porco celta ou galiña de Mos
Un ano máis, a Deputación de Lugo conta cunha destacada presenza neste evento internacional, a través dun espazo propio cun expositor desde o que se ofrecen cada día especialidades enogastronómicas únicas dos diferentes concellos da provincia.
“A historia deixounos pratos propios como o butelo e receitas singulares coma as dos nosos queixos. A innovación permitiunos recuperar a viticultura heroica da Ribeira Sacra para sentar os nosos viños no simposio das grandes denominacións de orixe do mundo”, destacou García Porto durante a súa intervención, explicando que na provincia de Lugo “non temos por que escoller”, porque “Lugo ten de todo”.
Sinalaba que “non hai palabras suficientemente elocuentes como para facer xustiza á realidade da oferta turística da nosa provincia”, poñendo en valor unha oferta “cunha variedade enorme no paisaxístico, no gastronómico e no monumental”. E convidou aos asistentes a Xantar a visitar a provincia de Lugo, onde “levamos anos apostando por un modelo de turismo de calidade, sostible e non masificado”.
Hoxe, o expositor da Deputación ofrece pan e queixo de Antas de Ulla e butelo e pastel da Fonsagrada. Mañá será a quenda dos produtos de Negueira de Muñiz e xa pasaron por este espazo outros pratos e produtos gastronómicos de concellos como o Valadouro, Alfoz e Lourenzá.