Villares sinala a mala negociación das TAC en Bruxelas como a principal causa de que a flota estea amarrada

Barro (Pontevedra), 26 de setembro de 2024. O conselleiro do Mar, Alfonso Villares, lamentou que parte da frota galega se atope amarrada debido á falta de posibilidades de pesca, unha situación dixo, “que causa dor” e da cal responsabilizou á mala negociación das TAC e cotas no mes de decembro en Bruxelas. Así o manifestou durante o acto de inauguración das novas instalacións da empresa Mariscos Alumar, onde recordou que desde o Goberno galego xa se puxera o acento entón no mal resultado para os intereses da pesca galega do acordo alcanzado polo ministro Planas no Consello de Ministros de Pesca da Unión Europea. “Un reparto que apenas supuxo avances respecto á proposta elaborada pola propia Comisión” engadiu.

O titular de Mar sinalou que resulta incomprensible o maltrato que se lle da frota galega “cando é unha das máis sostibles e respectuosas co medio ambiente do mundo”, afirmou. Nese sentido, recalcou que é o Goberno central quen defende as posibilidades de pesca no ámbito comunitario e que agora quedou patente que non había motivos para os cualificativos de “históricos” ou “moi bos” que aplicou entón o Ministerio. Por último, recordou a sentenza do mes de xaneiro do Tribunal de Xustiza da Unión Europea (TXUE) que sinalaba que no reparto e deseño dos TAC e cotas se debe ter en conta os factores sociais e económicos. Unha resolución, entende o responsable autonómico, que avala as demandas de Galicia para que se revise o actual reparto das posibilidades de pesca.