A Organización de Produtores Pesqueiros do Porto de Burela organizou este xoves en Barcelona un evento no que a protagonista foi a “Merluza D& Burela” en pratos de diferentes cociñas do mundo
Abriu a xornada Sergio López, xerente da OPP-7 do Porto de Burela, que deu a benvida a tódolos participantes e ademais fixo unha presentación das principais campañas de promoción realizadas nos últimos anos coa marca ‘Merluza D& Burela’.
Puxo en valor a importancia de Burela dentro do sector pesqueiro nacional e internacional, explicando os diferentes tipos de frotas socias da OPP e destacou a ecoetiqueta ‘Pescaenverde’ que converte á frota de altura de Burela que pesca a pescada do pincho na primeira certificada polo seu baixo impacto ambiental.
O turno dos fogóns abriuno o chef Daniel López, do restaurante O Camiño do Inglés, e a súa versión de cociña vanguardista co prato «Merluza D& Burela rechea de marisco», no que aplicou diferentes técnicas: curado do peixe en salmuera, cociñado a baixa temperatura e extracción de proteína para elaborar o pilpil.
Miguel F. Vidal, do restaurante Morgana, ofreceu a receita «Merluza D& Burela á galega; con allada, pataca cocida, cebola e guisantes» como exemplo dunha cociña máis tradicional pero igualmente espectacular e saborosa.
A continuación, de novo Daniel López elaborou a súa «Merluza D& Burela frita estilo chino», achegando este produto da lonxa de Burela á cociña asiática.
E finalmente, o chef Miguel F. Vidal pechou a xornada cociñando a pescada do pincho de Burela cun toque picante na súa receita mexicana «Taco de Merluza D& Burela en texturas, crema de aguacate, cebola encurtida e pico de gallo».
O público, no que se atopaban numerosos xornalistas e creadores de contido relacionados co mundo gastronómico, puido degustar cada unha destas elaboracións vivindo unha experiencia gastronómica “mundial” e viaxando co seu padal por diferentes cociñas do mundo tendo como orixe común a lonxa de Burela.
Tódolos asistentes, entre os que se suman case dous millóns de seguidores nas redes sociais, interactuaron cos chefs achegando preguntas sobre cada unha das diferentes formas de preparación da ‘Merluza D& Burela’, amosando así a versatilidade deste produto en canto a formas de elaboración.
Esta acción está cofinanciada pola Xunta de Galicia e o FEMPA, incluída no plan de produción e comercialización anual da OPP-7 Porto de Burela (Lugo) co obxectivo de contribuír á trazabilidade dos produtos da pesca e ao acceso dos consumidores a información clara e completa.