O alcalde de Foz, Fran Cajoto, explica que esta actuación foi posible grazas a un investimento de 32.000 euros aportados pola Deputación de Lugo: “fíxose unha renovación integral do parque, cun pavimento continuo de caucho con distintas cores e xogos de gran calidade”.
O rexedor municipal destaca “a nova estrutura con zona de escalada e togobán, apta para nenos de 3 a 14 anos, cunha lonxitude de máis de 9 metros e na que a plataforma máis elevada está a 2,10 metros do chan”.
O alcalde anuncia que “nun breve prazo substituiranse os 8 bancos existentes no parque por novo mobiliario e dispoñeranse catro pezas biosaudables (pedais, manivela rotativa, pé oscilante e zig-zag) para completar o espazo, en virtude aos remanentes da adxudicación que xa foron solicitados á administración provincial”.
Os traballos continúan estes días no parque infantil do Cu do Castro, na praia de Llas, que se pechou ao público durante a execución da obra.