Arden pellets acumulados nun silo en Viveiro

Viveiro, 17 de agosto, 2024. Ao fío das 12:30 horas unha persoa particular informaba ao 112 Galicia de que lle saltara o lume do queimador dunha caldeira de biomasa ao silo de madeira, na LU-862, quilómetro 87, ao carón da piscina, en Celeiro. Aseguraba que non había persoas afectadas.

Decontado, desde o 112 Galicia pasouse aviso aos Bombeiros de Viveiro, que xa tiñan constancia do incendio. Tamén se informou á Policía Nacional e aos efectivos do Servizo Municipal de Protección Civil da localidade.

Así, tras extinguir o lume, os Bombeiros comunicaron que unicamente arderan os pellets que había no interior do silo, sen que sequera afectara á estrutura. Arrefriaron a zona e deron por rematada a súa intervención.