O PP denuncia que Foz “estea sen aparcadoiros e con caos no tráfico pola desidia do alcalde”

Durante o goberno do Partido Popular, en Foz habilitáronse máis de 300 novas prazas de aparcamento

Foz, 18 de xullo de 2024. O Partido Popular denuncia que Foz estea sen aparcadoiros e con caos no tráfico pola desidia do alcalde. Estes días de alta intensidade e de persoas viñeron a confirmar o que viñan advertindo os populares cando instaban ao Concello a que liberase de escombros de obras as prazas públicas de aparcamento. “O alcalde non o quixo facer e agora vemos como a xente anda buscando lugares para estacionar o seu vehículo no centro urbano tendo moitas dificultades para atopalo”, lamenta o voceiro do PP de Foz, Javier Castiñeira.

“Aínda que tarde e no medio de verán, agradecemos que nos fixera caso en canto á seguridade viaria, pintando os pasos de peóns na rúa Irmandiños no barrio das Casas Baratas, e pedimos que tamén atenda ás nosas peticións en canto a liberar de escombros os aparcadoiros públicos”, sinala o voceiro popular

Hai que lembrar que durante o goberno do Partido Popular, en Foz habilitáronse máis de 300 novas prazas de aparcamento. Mentres, coa situación actual, estanse a perder preto dun cento de sitios habilitados para estacionar os vehículos e, ademais, co risco de que os propietarios se farten da falta de coidado das parcelas e pidan ao Concello a reversión das mesmas.

Caos no tráfico

“Pedimos que o alcalde solucione canto antes o problema existente co tráfico porque, por exemplo, as decisións que tomou de facer de dirección única a rúa Irmandiños está a cargar á rúa Corporacións, desencadeando en grandes colapsos en cruces que non estaban feitos para esa cantidade de tráfico. Todas estas circunstancias, dende logo, debe remedialas xa que quedan moitos días de verán e en caso de non facelo, probablemente, o pobo siga con caos como estivo estes últimos días de festa”, finaliza Javier Castiñeira.