O concelleiro de Medio Ambiente, Diego Dos Santos, confirmou que “desde o Concello de Ribadeo estamos procedendo a desbrozar as estradas da Deputación ao seu paso polo noso municipio porque están totalmente abandonadas. Vímonos na obriga de actuar por motivos de seguridade e ante o estado de abandono que presentan eses vieiros”.
O edil ribadense contou que “xa actuamos en Santalla, en Cedofeita, en Arante e tamén na Devesa, así como nas estradas das praias, que tamén son da Deputación”.
Dos Santos sinalou: “consideramos que antes da chegada da tempada alta as estradas deben estar en perfecto estado para o seu uso por parte das veciñas e dos veciños de Ribadeo e tamén dos milleiros de visitantes que recibiremos ao longo destas semanas. A seguridade é o máis importante, pero a imaxe que ofrezamos de Ribadeo tamén e as estradas non poden estar invadidas pola maleza, de aí que desde o Concello de Ribadeo decidiramos tomar medidas”.