A Xunta investiu 329.000€ na mellora da eficiencia enerxética do CEIP Santa María do Valadouro

O delegado territorial de Lugo, Javier Arias, explica que o centro conta con novas cubertas, carpinterías exteriores que incrementan o illamento e iluminación LED que reduce o consumo

O Valadouro, 4 de xuño de 2024. A Consellería de Educación, Ciencia, Universidades e FP executou obras de mellora da eficiencia enerxética do CEIP Santa María do Valadouro, cun orzamento de adxudicación próximo aos 329.000 euros.

O delegado territorial da Xunta en Lugo, Javier Arias, visitou hoxe o centro educativo para comprobar o resultado dos traballos, que se realizaron tanto no exterior como nos espazos interiores do centro educativo.

As obras incluíron a substitución das cubertas en mal estado nos soportais de acceso e no patio; así como na zona de despachos. As carpinterías exteriores cambiáronse por outras que proporcionan mellor illamento.

O proxecto tamén contemplou a substitución das luminarias por outras tipo LED de menor consumo con detectores de presenza nos corredores; a instalación de falsos teitos e o pintado das zonas afectadas polas obras.

Arias destacou que estas actuacións enmárcanse no Plan de Nova Arquitectura Pedagóxica que impulsa a Xunta para modernizar toda a rede de centros educativos públicos.