Licitado o sendeiro litoral entre Os Castelos e a praia de Fomento en O Vicedo, cun orzamento de máis de 311.000 euros

A recente construción do paseo de Os Castelos e o acondicionamento da praia de Fomento sumaranse a esta obra para conectar o litoral e ampliar a oferta xa existente de rutas de sendeirismo, miradoiros e áreas recreativas

Lugo, 23 de marzo de 2024. A subdelegada do Goberno en Lugo, Isabel Rodríguez, deu conta do anuncio recollido no Boletín Oficial do Estado sobre a licitación do proxecto de execución do sendeiro litoral no concello de O Vicedo entre Os Castelos e a praia de Fomento, que se construirá tras a recuperación da servidume de tránsito. O orzamento base de licitación é de 311.469,47 euros.

A subdelegada explicou que “o proxecto persegue a finalidade de favorecer o desfrute para toda a veciñanza de novas franxas da costa da Mariña, dando continuidade á aposta tanto do concello como do Goberno polo valor paisaxístico desta zona, ampliando a oferta existente de rutas de sendeirismo, miradoiros e áreas recreativas”.

Esta senda comeza no Camiño da Fábrica e discorre ata o entronque co paseo de Os Castelos, construído recentemente pola Dirección Xeral de Sustentabilidade da Costa e do Mar na avenida de Arealonga do concello mariñao. Ademais, acondicionouse parte do espazo na praia de Fomento, que sumado ao novo anuncio permitirá continuar coa mellora e conexión deste tramo do litoral.

A subdelegada subliñou que “demostramos con feitos a aposta do Goberno pola conservación e mellora do litoral, cun investimento total de máis de 2,2 millóns de euros na provincia, concretamente nos concellos de Foz, Barreiros, Ribadeo e agora O Vicedo”. Neste senso, Rodríguez lembrou as últimas obras realizadas, como a senda peonil de 16 km entre as praias focenses de Peizás e A Pampillosa, cun custo de 886.500 euros, ou as melloras nas praias de Arealonga e Valea con 900.000 do Plan de Recuperación.