A deputada de Cultura Iria Castro celebrou esta cifra, que supón un aumento de máis do 5% con respecto a 2022, cando se rexistraran 63.650 visitas, e valorou o traballo desenvolvido polo persoal dos museos “na conservación, estudo e promoción do patrimonio, cunha destacada actividade expositiva, centrada na arte galega contemporánea, e unha ampla axenda de actividades dirixidas a recoller e integrar a memoria de persoas anónimas na museoloxía, a través dun contacto estreito e continúo con distintos colectivos sociais”.
Segundo os datos recollidos, o 45% dos visitantes dos centros xestionados pola Vicepresidencia da Deputación de Lugo chegaron desde distintos puntos de Galicia, mentras outro 45% procedían doutros puntos do Estado, maioritariamente de Madrid, Castilla y León e Andalucía.
As visitas internacionais supuxeron o 10% das persoas que se achegaron aos museos provinciais, destacando na listaxe de países de procedencia Estados Unidos, Reino Unido, Portugal, Alemaña, Arxentina ou Italia.
Exposicións temporais
A Sala de Exposicións do Museo Provincial de Lugo acolle ata o 4 de febreiro a exposición retrospectiva “Leopoldo Novoa. O silencio da pintura”, que inclúe 32 obras entre cadros e libros ilustrados polo artista pontevedrés, unha das grandes referencias da arte abstracta tanto dentro como fóra de Galicia na segunda metade do século XX.
Ademais de homenaxear a traxectoria de Leopoldo Nóvoa, no último ano, a actividade expositiva do Museo Provincial de Lugo centrouse na promoción e divulgación da arte galega contemporánea con fitos como a inauguración da Sala Monográfica Tino Grandío, na que se se expoñen as obras máis representativas do pintor lucense, a mostra da pintora coruñesa “María Corredoira” no segundo trimestre do ano ou a mostra retrospectiva sobre o escultor sarriao José Díaz Fuentes “A árbore interior”, nos primeiros meses de 2023.
Sestercio da caetra
No 2023, o Museo Provincial de Lugo reforzou tamén o seu posicionamento como centro de referencia internacional no estudo da romanización coa adquisición do sestercio da caetra, unha moeda acuñada no século I a.C. e da que se coñecen só tres exemplares no mundo.
Neste inicio de ano, a Vicepresidencia da Deputación de Lugo renovará a Sección de Numismática e Medallística do Museo Provincial de Lugo para expoñer de forma permanente esta peza, acuñada no campamento militar que deu orixe á cidade.
Xornada sobre educación e museos
No ano que entra, a Rede Museística Provincial acollerá do 3 ao 5 de xullo as Xornadas Internacionais sobre museos e educación, na que se exporán experiencias para a difusión de patrimonio e cumprimento dos dereitos culturais desenvolvidas nunha decena de museos do Estado entre os que figuran o Museo do Prado, o Museo Arqueolóxico ou o Museo de Altamira, o Museo do Pobo Galego ou o Museo de Pontevedra.
No encontro, con sede compartida entre os catro museos provinciais, daranse a coñecer materiais e estudos que se están a desenvolver nestes meses por parte dunha ampla rede de investigadores universitarios, profesorado de secundaria e xestoras de museos e que teñen como obxectivo promover mudanzas no enfoque da educación histórica con novas narrativas creadas a partir do patrimonio dos distintos museos.