A Garda Civil detén por grooming a un veciño da Mariña que lles solicitaba a menores de idade fotos con contido sexual

Investígaselle así mesmo por un delito de coaccións a menores de idade, cinco das vítimas tiñan menos de 12 anos

A Mariña, 29 de xaneiro de 2024. A Garda Civil, no marco da operación “soucas” detivo a un veciño da Mariña Lucense, de 34 anos de idade como suposto autor dos delitos de agresión sexual, coaccións (acoso con fins sexuais) e grooming (contacto con menores de 16 anos con fins supostamente sexuais).

O feito ten lugar o pasado ano, cando o presunto autor enviaba mensaxes, a través dunha coñecida rede social, a mulleres e nenas menores de idade, solicitando encontros de índole sexual e fotografías intimas, usando unha linguaxe claramente sexual.

Ante a gravidade dos feitos, xerouse alarma social entre os habitantes das localidades da comarca, ademais do temor de varias das vítimas e as súas familias, ao sentir que se atopaban ante un posible depredador sexual.

A persoa detida foi posta ao dispor do Xulgado de Primeira Instancia e Instrución nº 1 de Viveiro.