Un home foi auxiliado por particulares tras internarse no mar para rescatar ao seu can en Foz

Foz, 4 Novembro, 2023. O 112 Galicia foi informado do ocorrido a través de Urxencias Sanitarias de Galicia-061, minutos despois das 13:30 horas: un home acababa de meterse na auga na praia de Rapadoira (Foz) para rescatar ao seu can, que se lle escapara.

Pouco despois, conseguiu subir a unhas rochas co animal, e diversos particulares que se atopaban na zona trataron de auxilialos con cordas, de xeito infrutuoso.

Entón, desde o 112 Galicia solicitouse a colaboración de Salvamento Marítimo, do Servizo de Gardacostas de Galicia, da Garda Civil e da Policía Local de Foz.

O Servizo de Gardacostas de Galicia chegou a mobilizar o helicóptero de rescate Pesca II, aínda que finalmente un home conseguiu rescatar ao can e ao implicado, que foi atendido polos servizos sanitarios.