A alcaldesa reitera a necesidade desta infraestrutura e pide compromiso económico da Xunta ao respecto
Xa durante o verán, a mandataria municipal se dirixira ao presidente da Xunta, Alfonso Rueda, sen obter resposta ata o momento; trasladándolle o déficit en servizos que ten o municipio a raíz do crecemento sen planificación que se produciu neste concello.
Ante a falta de resposta do máximo mandatario galego, Ermida traslada novamente á conselleira “a necesidade acuciante que ten Barreiros de mellorar o sistema de depuración e, nomeadamente, de poder contar cunha nova EDAR para a que xa existe proxecto, mais non finanzamento”.
Ana Ermida manifesta que é coñecedora da preocupación da conselleira por este tema e tamén do seu compromiso por solucionalo, “tal e como manifestou publicamente nun acto ao que acudiu a este concello hai uns meses, na campaña electoral das eleccións municipais”.
No escrito reitérase o que xa se lle trasladou á Xunta en varias ocasións, facendo fincapé na chegada de fondos europeos e na oportunidade que pode existir, tal e como se fai noutros concellos. Por esta razón, reiterou “a necesidade de que desde o Goberno da Xunta de Galicia teñan en conta a especial situación do Concello de Barreiros para priorizar os proxectos de investimento no mesmo, considerando que podemos contribuír a mellorar o noso País e a xestión dos fondos dos que dispón o seu goberno a través dos orzamentos que elabora”.
Ermida considera que o compromiso que poida existir desde a Xunta de Galicia e a súa intención por solucionar estes problema serían moito máis visibles se se dotara economicamente unha partida nos orzamentos da Xunta para o 2024 que se están a elaborar.