O chef, que na noite do mércores ceou por primeira vez a bordo dun barco pesqueiro, asistiu desde as 6 da mañá á poxa de pescada na lonxa de Burela, podendo comprobar en primeira persoa a calidade do produto e intercambiar impresións con armadores, compradores e exportadores de peixe.
Martín Berasategui estivo acompañado polos presidentes e xerentes de ABSA e OPP-7, Juan José Otero, Abelardo Basanta, Miguel Neira e Sergio López, xunto a outros directivos de ambas entidades.
Ás 8:30h uniuse o grupo de autoridades encabezado polo conselleiro do Mar da Xunta de Galicia, Alfonso Villares; a xefa territorial da Consellería do Mar, Mariña Gueimunde; o delegado territorial da Xunta de Galicia, Javier Arias; a alcaldesa de Burela e presidenta da Fundación Expomar, Carmela López; o concelleiro do Mar de Burela, Ramiro Fernández; o patrón maior da Confraría de Pescadores de Burela e presidente da Federación Nacional de Confrarías, Basilio Otero; ou o presidente de Hostalería de Galicia, Cheché Real; ademais de socios e directivos tanto da OPP como de Absa e outros representantes políticos e do sector pesqueiro da zona.
A comitiva realizou unha breve visita á lonxa e visitaron un buque palangreiro atracado no porto de Burela para coñecer de primeira man como se realiza a bordo a pesca da pescada do picho. Regino Basanta, armador do buque Idurre Berria, socio de ABSA e OPP, explicou os detalles da pesca coa arte do palangre de fondo.
A xornada finalizou no salón de actos de ABSA co primeiro acto de divulgación de ‘Merluza D& Burela’ que se celebra en Burela para os seus socios e para o público xeral, despois de moitas outras presentacións de produto noutras cidades de España.
Miguel Neira, xerente de Armadores de Burela, deu a benvida ao acto e destacou a honra que significa para Burela ter aquí a unha figura tan internacional como Berasategui. Tamén lembrou a anécdota de como se xestou o prato de merluza de Burela que se serviu a Robert de Niro naquel mítico “menú impagable” de Madrid Fusión.
A continuación Sergio López, xerente da OPP-7 Burela, encargouse de facer unha presentación das principais campañas de promoción realizadas nos últimos anos con marca ‘Merluza D& Burela’.
Celebrou o aniversario centenario que cumpre este ano o Porto de Burela e explicou os diferentes tipos de frotas socias da OP, poñendo o acento na ecoetiqueta ‘Pescaenverde’ que converte á frota de altura de Burela na primeira certificada polo seu baixo impacto ambiental. E finalmente amosou pezas dalgunhas das principais accións e campañas de promoción de ‘Merluza D& Burela’ e ‘Peixe de Burela’.
Pola súa banda, o conselleiro do Mar da Xunta de Galicia, Alfonso Villares, insistiu na importancia da soberanía alimentaria para calquera país, fronte a falsos discursos medioambientalistas; e destacou o corazón que pon no seu traballo a xente do mar de Galicia, que é a principal rexión produtora de peixe de Europa.
Pechou o acto Martín Berasategui, encumbrado xa como gran “Embaixador da Merluza D& Burela” e lucindo unha nova chaquetiña que proclama o seu “Amor ao Mar”, a Burela, a Galicia, ás súas xentes e, sobre todo, ó seu peixe.
Como primicia anunciou o novo prato creado polo 30 aniversario do seu restaurante de Lasarte: “Lombo de Merluza D& Burela con cocochas, leite de améndoa e esencia de percebe”.
O chef lembrou a orixe do seu lema “Garrote” e os seus inicios humildes no Bodegón Alejandro de San Sebastián co que logrou aquela histórica primeira estrela Michelín das 12 que agora ostentan os seus restaurantes.
A maior demanda que lanzou Berasategui foi que nas escolas deberían ensinar aos nenos a alimentarse doutra maneira, con produtos máis frescos e máis saudables, aproveitando a calidade de produtos propios como a pescada do pincho que pescan as frotas de Burela.
E deixou Burela prometendo apoiar con “triplo garrote” aos sectores primarios españois, despois de coñecer en primeira persoa o esforzo e a dedicación da xente do mar de Burela: “A gastronomía mundial non sería nada sen a xente que se esforza no seu traballo como facedes os pescadores de Burela”.
Esta acción está cofinanciada pola Xunta de Galicia e o FEMPA, e inclúese no plan de produción e comercialización anual da OPP-7 Porto de Burela co obxectivo de contribuír á trazabilidade dos produtos da pesca e ao acceso dos consumidores a información clara e completa.