Portos de Galicia e as federacións de confrarías coinciden na vontade de traballar coordinados para proseguir co desenvolvemento dos peiraos

Santiago de Compostela, 19 de xullo de 2023. O presidente de Portos de Galicia, José Antonio Álvarez, mantivo esta mañá unha reunión cos presidentes das federacións galega e provinciais de confrarías de pescadores para afondar nos eixos de traballo e colaboración entre ambas partes para continuar avanzando no desenvolvemento dos peiraos de titularidade autonómica.

José Antonio Álvarez puxo en común cos presidentes da Federación Galega de Confrarías de Pescadores e das tres provinciais -A Coruña, Lugo e Pontevedra- as principais liñas de actuación do ente dependente da Consellería do Mar así como as problemáticas e necesidades dos colectivos profesionais de cada zona. Nesta liña, ambas partes coincidiron na evolución positiva das instalacións portuarias e na vontade de seguir traballando conxuntamente para avanzar nesa tendencia.