O popular José Manuel Lamela comprométese a abrir o centro de día do Valadouro nos seis primeiros meses, se ten a confianza dos seus veciños para gobernar

Hai persoas maiores do municipio que teñen que usar o servizo de centro de día en Foz ou Burela, coas conseguintes molestias e gastos a maiores

O Valadouro, 14 de maio de 2023. O candidato popular á alcaldía do Valadouro, José Manuel Lamela, na súa folla de ruta ten marcadas prioridades moi claras, co obxectivo de poder atender canto antes aquelas cuestións que considera que son máis necesarias para o benestar dos seus veciños. Nesta lista de prioridades está o centro de día, que se compromete a abrir nos seis primeiros meses de goberno, se conta coa confianza dos seus veciños e veciñas.

Lamela di que a falta dun centro de día no Valadouro obriga a que algunhas persoas maiores do municipio teñan que utilizar o citado servizo en Foz e Burela, coas conseguintes molestias e gastos a maiores. O alcaldable popular lembra que o centro de día estará situado nun local municipal e destaca a incapacidade do goberno local saínte para tramitar a súa apertura.

Lamela sinala: “O centro de día é un servizo moi demandado no Valadouro e o meu compromiso é claro; se teño a confianza dos meus veciños e goberno, nos seis primeiros meses estará en funcionamento”. Engade: “É un servizo que prometeron moitas veces, pero a pesar de contar coas instalacións non se está a prestar en Ferreira”.