Constata a CIG a preocupación pola espiral xeneralizada da suba dos prezos e da inflación, nomeadamente de bens e produtos básicos de consumo, que está a causar unha importante deterioración nas condicións de vida da clase traballadora e da maioría do pobo galego.
Moitas das medidas tomadas polos gobernos español e galego son reformas claramente lesivas e regresivas, feitas para satisfacer as duras exixencias da UE para recibir uns envelenados fondos europeos que están a hipotecar o noso futuro.
A nova reforma das pensións que amplía os recortes, negando o dereito a unha pensión digna, consolida as reformas anteriores e aumenta máis o período de cálculo, aos 29 anos -excluíndo os peores 24 meses-, afondando o resultado que levamos anos acumulando de caída nas contías das pensións, con especial afectación ás persoas menores de 50 anos. Esta reforma das pensións vén sumarse a última reforma laboral, aprobada sen derrogar as de 2010 e 2012, coa que, a un ano da súa entrada en vigor, baixo as novas formas contractuais seguen a medrar a flexibilidade, a inestabilidade laboral e os baixos salarios e avanza imparábel a precariedade.
Tamén son denunciables os beneficios millonarios que está obtendo o capital tirando proveito da inflación e da carestía da vida, como constatan os históricos beneficios da banca e das empresas enerxéticas, que non paran de medrar.
O goberno galego do PP está “entregado” a facilitarlle ao capital español e internacional todo tipo de negocios coa privatización dos servizos públicos, a eucaliptización do noso monte e consolidando un novo proceso de colonización enerxética, coa actual ofensiva eólica.
Por outra banda, a comarca da Mariña segue a ser ignorada polos orzamentos estatais e galegos que, a pesar da critica situación da industria, das infraestruturas e dos sectores produtivos, continúan mantendo a política de inversións cero.
Por todo isto a CIG chama á mobilización ante a patronal e ante os gobernos, para dar resposta a unha realidade económica e social extrema.
Mobilización do PRIMEIRO DE MAIO na Mariña
Este ano a manifestación do 1ª de maio da CIG terá lugar en Burela, con saída ás 12h do local sindical (Avda. Arcadio Pardiñas 137).