O rexedor explicou que “este ano solicitamos subvención para infraestruturas turísticas porque consideramos que todo o que sexa mellorar Burela tanto no aspecto turístico como no medioambiental, que están moi ligados, é moi positivo para o pobo. E temos concedida unha subvención duns 30.000 euros, que imos destinar á plantación de árbores frondosas e froiteiras, vamos mellorar a área recreativa do Monte Castelo coa colocación de máis mobiliario e imos ordenar máis a zona onde está o telescopio panorámico, preparándoo ben para que sexa atractivo e facer unha plantación floral para que ter unha especie de xardín botánico. Tamén vamos traballar con esta subvención nun tema etnográfico, que nos parece moi importante: na zona de Pomeda, en Vila do Medio, houbo un muíño do que agora só queda o esqueleto e imos colocar uns paneis informativos sobre como funcionaba e como traballaban alí; é unha información moi atractiva para ese lugar onde hai unha ruta de sendeirismo, que é moi empregada e queremos ampliala, tamén a través desta subvención”.
Alfredo Llano pensa que “todo isto atraerá moita xente para facer deporte e tamén para visitar o noso concello como un lugar importante no aspecto etnográfico. Tamén colocaremos varios carteis turísticos para dar información a toda a xente que se achegue tanto á area recreativa como á zona de Pomeda. Imos preparar algo que motive a andar, a gozar da natureza e a contemplar grandes vistas desde o Monte Castelo, onde se pode divisar unha das estampas extraordinarias de Burela”.
O alcalde dixo que “todo isto faise porque a miña intención clara é crear en Burela o que se denomina un ecosistema, que consiste en que a actividade social e a medioambiental estean nun perfecto equilibro. Xa fixemos durante estes últimos anos moitas cousas que teñen que ver con isto, como as hortas urbanas, que teñen moito que ver coa cuestión medioambiental e ao mesmo tempo co aspecto social; a medición da calidade do aire, para o que se instalou unha caseta e temos un convenio con Alcoa e podemos coñecer as medidas constantemente; a humanización de rúas, que xa fixemos varias e está previsto acometer outras; a captura do CO2, que é algo que preocupa agora nos obxectivos 2030 e que estamos acadando coa plantación de árbores frondosas e froiteiras tanto no Monte Castelo como no resto do municipio. Cremos que é moi importante todo isto. Tamén temos en marcha un sistema de control da auga para detectar as posibles perdas, se as houbera: hai varios puntos desde os cales se determina claramente se hai algún tipo de fuga e sabémolo case ao instante”.
Llano engadiu que “todo isto no seu conxunto supón crear unha estrutura e un comportamento medioambiental e social para que Burela sexa un exemplo de ecosistema. E esta subvención vamos aproveitala para agrandar estas posibilidades”.