Un dos obxectivos desta charla foi escoitar de primeira man a experiencia e o traballo dunha xornalista, coñecer os elementos principais da construción das noticias e aprender a distinguir os distintos ámbitos e recursos que compoñen a información que recibimos a diario a través de diferentes medios e plataformas de comunicación.
Parte deste alumnado (un grupo de 1º de Bacharelato e outro grupo de 4º da ESO) traballarán na redacción de dúas reportaxes que serán publicadas na web de prensaescuela, e na que participan tamén outros dezaseis centros de distintos lugares das catro provincias galegas.
Tamén aproveitamos a charla e os consellos de Sara Carreira para coñecer e decidir o reparto de responsabilidades do equipo de Embaixadores/as junior do Parlamento Europeo. O centro forma parte deste proxecto desde o curso 2019-2020 e ten, entre os seus obxectivos principais, a difusión de noticias relacionadas co Parlamento Europeo e a xuventude; e son os alumnos e alumnas os encargados de dinamizar a través das distintas plataformas informativas ao seu alcance os contidos que consideren máis interesantes e actuais.
Estamos convencidos de que esta actividade contribuirá na formación do noso alumnado na curiosidade da información e no sentido crítico necesario para discernir e valorar os argumentos e os contidos da realidade que se nos presenta desde moitas e variadas perspectivas.