Os grupos de acción local do sector pesqueiro galego desenvolveron entre 2016 e 2021 máis de 660 proxectos cun investimento total de máis de 80 millóns de euros e a creación de 470 empregos a tempo completo
Santiago de Compostela, 1 de decembro de 2022. As conselleiras do Mar, Rosa Quintana, e de Medio Ambiente, Territorio e Vivenda, Ángeles Vázquez, participaron hoxe no acto de entrega da terceira edición dos Premios Economía Azul, uns galardóns que pretenden recoñecer o labor de catro proxectos sustentables dos grupos de acción local do sector pesqueiro (GALP) que contribúen a dinamizar a súa contorna. Precisamente, a titular de Mar salientou o esforzo que realizan os GALP na posta en marcha de iniciativas que permiten impulsar a economía das zonas costeiras e preservar o patrimonio e a cultura mariñeira na súa área de influencia.
Rosa Quintana subliñou que os catro gañadores nesta edición -froito dos preto de 4.500 votos rexistrados- son unha pequena mostra da aposta constante destes grupos polo mundo do mar en todas as súas vertentes, desde as actividades vencelladas coa extracción e a valorización dos produtos do mar ata a difusión e protección dos sinais de identidade das localidades pesqueiras e costeiras da comunidade.
Pola súa parte, a conselleira de Medio Ambiente, Territorio e Vivenda subliñou a importancia que teñen este tipo de galardóns xa que permiten recoñecer e darlle visibilidade a proxectos de gran valor ambiental para avanzar na protección dos valores e da riqueza natural que caracteriza á costa galega.
A modo de exemplo, referiuse á iniciativa Plancton (Plan de conservación territorial-ON), promovida pola obra social de Abanca e a quen lle entregou precisamente hoxe, xunto á conselleira do Mar, un recoñecemento especial. Tras subliñar que se trata dun proxecto multidisciplinar no que tamén colabora a Xunta e que busca reducir a presenza de residuos en zonas costeiras protexidas, Ángeles Vázquez incidiu no problema que supón a nivel global o lixo mariño e na importancia de promover accións que, coma esta, sensibilicen á sociedade e minimicen o seu impacto.
Ao acto de entrega dos premios, que se celebrou na Cidade da Cultura, tamén asistiron distintos representantes da Consellería do Mar como a directora xeral de Desenvolvemento Pesqueiro, Susana Rodríguez, e o delegado territorial da Xunta na Coruña, Gonzalo Trenor, así como as presidentas e presidentes dos GALP de Galicia e outras autoridades dos municipios costeiros galegos.
A iniciativa premiada na categoría de Apoio á pesca costeira artesanal foi o proxecto Acondicionamento do espazo da lonxa de Portonovo para a mellora do uso turístico e comercial implantando novas tecnoloxías – LonxaTour, promovido pola confraría de pescadores de Portonovo ao abeiro do GALP Ría de Pontevedra.
No ámbito da Creación de Emprego o gañador foi Produción de algas comestibles das Rías Baixas galegas, impulsado pola empresa H. Q. Seaweed a través do GALP Ría de Vigo-A Guarda. Mentres, na categoría de Diversificación resultou premiada a acción Creación da aula do mar A Mariña, posta en marcha pola Asociación de Saúde Mental da Mariña baixo o paraugas do GALP A Mariña-Ortegal.
O cuarto premio, sobre Economía Circular, correspondeu ao proxecto Centro de transformación do lixo mariño, promovido pola Asociación de mulleres do sector pesqueiro Seo de Fisterra e Ría de Muros-Noia, ao abeiro do GALP Costa Sostible.
Premio especial
Esta edición dos Premios Economía Azul inclúe un recoñecemento especial ao proxecto Plancton, desenvolvido por Afundación (a obra social de Abanca) en 2021 e que permitiu retirar nese ano case 19 toneladas de residuos dos areais e fondos mariños de distintas zonas costeiras da comunidade.
O obxectivo deste galardón é destacar unha acción realizada á marxe dos GALP e que ten unha importante relevancia para o conxunto do sector, especialmente no que ten que ver coa protección do medio ambiente. De feito, nesta acción -que está a ter continuidade en 2022- participaron preto de 800 persoas voluntarias tanto de Abanca e Afundación como doutros colectivos do sector pesqueiro e marisqueiro e outras entidades que participaron directamente nas xornadas organizadas para a limpeza de fondos e costas.
Durante o acto a conselleira do Mar salientou o traballo dos grupos de acción local do sector pesqueiro a prol da dinamización das zonas costeiras e da diversificación da súa actividade económica. Neste sentido, lembrou que os máis de 660 proxectos desenvolvidos entre 2016 e 2021 ao abeiro dos GALP contaron cun investimento total de máis de 80 millóns de euros e permitiron crear 470 empregos a tempo completo. Mentres, a actividade inducida acadou os 230 millóns de euros -o 0,36% do PIB de Galicia- e supuxo a xeración de máis de 5.000 postos de traballo entre directos e indirectos.
Rosa Quintana tamén incidiu en que os proxectos premiados xeraron importantes beneficios para o sector pesqueiro e para a súa área de influencia contribuíndo á creación de emprego, ao reforzo da identidade da cultura e do patrimonio local, introducindo elementos innovadores e creando oportunidades para as mulleres e a mocidade no sector marítimo-pesqueiro galego.
Os galardóns
Os Premios Economía Azul, que chegan á súa terceira edición tralas de 2017 e 2019, están promovidos pola Consellería do Mar a través da Dirección Xeral de Desenvolvemento Pesqueiro. Con eles preténdese recoñecer ás entidades e persoas promotoras dos proxectos destacados subvencionados ao abeiro das axudas concedidas no marco das estratexias de desenvolvemento local participativo, dar visibilidade ao labor dos GALP na dinamización das zonas do litoral e animar a potenciais promotores a que presenten iniciativas coas que impulsar o sector marítimo-pesqueiro e preservar o patrimonio costeiro.
Os 12 finalistas foron seleccionados por unha comisión da Dirección Xeral de Desenvolvemento Pesqueiro entre as propostas presentadas polos GALP tendo en conta os beneficios que xeraron para o sector e a súa área de influencia. A elección dos proxectos gañadores realizouse mediante unha votación pública entre os días 4 e 25 de novembro na que participou a cidadanía -contabilizándose preto de 4.500 votos- a través da páxina web https://galp.xunta.gal/. Os galardóns non teñen dotación económica, pero supoñen un recoñecemento público para os proxectos destacados en cada unha das categorías.
Os proxectos gañadores nesta terceira edición dos Premios Economía Azul foron:
Mellor proxecto de apoio á pesca costeira artesanal: Acondicionamento do espazo da lonxa de Portonovo para a mellora do uso turístico e comercial implantando novas tecnoloxías – LonxaTour. Este proxecto da confraría de pescadores de Portonovo, ao abeiro do GALP Ría de Pontevedra, busca mellorar a comercialización dos produtos pesqueiros da lonxa local e mellorar a oferta de turismo mariñeiro no centro de primeira venda impulsando tamén a sensibilización medioambiental.
Mellor proxecto de creación de emprego: Produción de algas comestibles das Rías Baixas galegas. A iniciativa posta en marcha pola empresa H.Q. Seaweed SL baixo o paraugas do GALP Ría de Vigo-A Guarda pretende avanzar no proceso de envasado e etiquetado das algas así como na súa comercialización. Trátase de poñer en valor este recurso do mar de Galicia que cada vez conta con maior demanda e maiores posibilidades no ámbito da gastronomía.
Mellor proxecto de diversificación: Creación da aula do mar A Mariña. Este proxecto da Asociación de Saúde Mental A Mariña, desenvolvido a través do GALP A Mariña – Ortegal, está dirixido a persoas con enfermidade mental crónica e pon en valor o patrimonio costeiro e os recursos patrimoniais e ambientais da Mariña lucense.
Mellor proxecto de economía circular: Centro de transformación do lixo mariño. Esta iniciativa impulsada pola Asociación de mulleres do sector pesqueiro Seo de Fisterra e Ría de Muros-Noia ao amparo do GALP Seo de Fisterra Ría de Muros-Noia Costa Sostible ten como obxectivo aproveitar e reutilizar os residuos mariños recuperados na contorna costeira, especialmente aqueles derivados da actividade pesqueira.
Esta familia naceu arredor de cinco irmáns: Paco, Esperanza, Toñito, Juan José (Sé) e Joaquín. Tocoulles vivir tempos difíciles na xuventude, véndose obrigados algúns deles a emigrar. Na reunión estiveron presentes os tres que se ven na foto: Esperanza, Sé e Joaquín, xunto con fillos, sobriños, etc. Unha reunión entrañable, porque había bastante tempo que a familia non se reunía.
A Garda Civil imputa en calidade de investigada a unha veciña de San Miguel de Reinante de 38 anos de idade como suposta autora dun delito de simulación de delito. A persoa investigada denuncio en dependencias oficiais dous cargos indebidos na súa conta bancaria. Iniciouse entón unha investigación policial comprobando documentalmente que os cargos se corresponden con dúas cotas dun préstamo ao consumo contratado pola investigada e ingresado na súa propia conta. Supostamente a persoa investigada pretendía que a entidade bancaria devolvéselle os importes das cotas domiciliadas tras formular a denuncia ante a Garda Civil. As dilixencias policiais foron remitidas á Autoridade Xudicial
Aproveitouse despois para ver o partido entre Almería e Dépor lembrando "as peñas irmáns que hai polo territorio estatal". A peña burelá agarda repetir nova cita antes do remate da actual tempada coa intención de celebrar éxitos dos distintos equipos que compoñen a estrutura do RC Deportivo.
Destacou a súa importancia para preservar a memoria histórica e recoñecer o esforzo das xeracións que converteron o porto de Celeiro nun referente pesqueiro. Puxo en valor o rico patrimonio mariñeiro e cultural da Mariña, facendo fincapé “que esta exposición é unha oportunidade para recoñecer o esforzo e a dedicación das persoas que ao longo de cen anos contribuíron ao crecemento e consolidación do porto celeirense”. A mostra, situada na sede da confraría, inclúe maquetas de barcos, fotografías, vídeos históricos, pinturas dos patróns maiores e obxectos singulares como a acta fundacional e maquinaria antiga. A visita complétase cun percorrido por espazos emblemáticos como a lonxa e o porto. Os actos do centenario culminarán coas XXVIII Xornadas Técnicas de Difusión do Sector Pesqueiro, un referente anual do sector.
Este evento anual destaca pola súa coidada selección musical e por ofrecer unha experiencia única na localidade lucense de Vilalba. Tras o éxito da pasada edición, que superou os 6.000 asistentes e contou con actuacións destacadas como as de Iván Ferreiro, Dorian e El Columpio Asesino, o FIV segue apostando por grandes nomes do indie nacional. As primeiras confirmacións do cartel serán anunciadas nas vindeiras semanas, mantendo a emoción e as expectativas para esta nova cita.
Nesta actuación, que serve de antesala para conmemorar o 25N, Día Internacional da Eliminación da Violencia contra a Muller, a coñecida maga realiza unha defensa da igualdade a través da maxia. O espectáculo é para todos os públicos e celebrarase na Casa dá Cultura de Cariño a partir das 18:30 horas. Conta con entrada libre e gratuíta ata completar aforo, polo que todos os interesados poderán acudir sen ter que realizar unha reserva previa.
Foi recibido no Concello polo alcalde, Dani Vega quen explicou que “dentro das visitas que estamos tendo en Ribadeo, recibimos ao Comandante Naval da Coruña e de Ferrol, o capitán de Fragata Javier García, que nos expuxo todo o tipo de propostas e de colaboracións que vamos ter con eles. E desde logo parécenos unha proposta interesante para tamén ter unha relación cos institutos, cos centros educativos e tamén co traballo que realiza en toda esta zona, desde Ribadeo ata A Coruña”. Vega engadiu: “nosoutros dentro da colaboración que estamos tendo con todas as administracións, creo que é positivo seguir nesta liña”.
