Patricia Otero subliña o reparto equitativo do investimento nos concellos, mentres a Xunta os emprega de forma partidista beneficiando aos gobernados polo PP
A representante socialista interpelou ao presidente da Deputación de Lugo trala súa comparecencia no Parlamento de Galicia, ao que agradeceu a mesma, ao igual que á presente deputada provincial encargada da área económica, Mayra García.
Patricia Otero centrouse nas diferencias existentes entre o goberno da Deputación de Lugo e a Xunta de Galicia, afirmando que “hai outra forma de xestionar os recursos”, polo que contrapuxo a “transparencia” amosada por Tomé na súa comparecencia coa “opacidade da Xunta”, así como a “lealdade” con outras administracións ao recoñecer que o orzamento do ente provincial aumenta grazas ás transferencias do goberno do Estado, “realidade que non quere recoñecer goberno galego”.
A este respecto, incidiu no reparto de fondos aos concellos, xa que aseverou que dende a Deputación repártense “a gobernos de todas as cores políticas e con total claridade”, mentres que o goberno galego asigna maiores recursos aos que están gobernados polo PP, co caso “especialmente grave” de Augas de Galicia, que “decide que as obras de saneamento son competencia autonómica ou municipal segundo goberne”.
A parlamentaria socialista trasladou á Cámara Galega a denuncia dos concellos, a través da FEGAMP, de que o goberno da Xunta ten conxelado dende hai 10 anos o fondo de cooperación para os concellos, mentres goberno municipal aumentou a partida para os mesmos.
Debido ás comparecencias que durante toda esta semana se están a producir no Parlamento en relación ao proxecto de orzamentos da Xunta, Otero referiuse aos déficits dos mesmos en anos anteriores, poñendo o punto de mira na baixa execución dos mesmos.
AS CONTAS “NON PASAN A PROBA DO ALGODÓN”
Respecto das infraestruturas para a provincia de Lugo, contrapuxo de novo o que é unha “política de feitos” na Deputación contra unha de “anuncios e publicidade” da Xunta, xa que as partidas son “un copia e pega” doutros anos, de obras anunciadas “a bombo e pratillo” que quedaron sen realizar. En total son 150 millóns de euros sen executar en infraestruturas nos dous últimos anos por parte do goberno galego, segundo cifra a deputada socialista.
No ámbito da pesca, do que é tamén voceira do grupo parlamentario e que ten especial relevancia na provincia, recordou que “de nada vale facer unhas contas triunfalistas” se logo hai anos “nos que non se chega nin á metade da execución orzamentaria”. Esta situación é común a todas as áreas de competencia da Xunta, polo que as súas contas “cando facemos a proba do algodón, quedan nun bluff”.
Amosou a súa inquietude porque que se poidan desaproveiten os fondos europeos pola “xestión incapaz” da conselleira do Mar, xa que o 80% do orzamentado nesta área son fondos europeos, que de non se executaren terían que ser devoltos.
Otero tamén agradeceu o labor social do goberno provincial, que “viuse na obriga” de facerse cargo das competencias da Xunta que non asume, como no ámbito da política social. Reivindicou as seis residencias de maiores que se abrirán nesta lexislatura polo goberno da Deputación, fronte á “desaparición do goberno galego”, que non abriu ningunha nun territorio que sufre dun avanzado envellecemento da poboación, alegou.
A deputada socialista finalizou lamentando a política de confrontación da Xunta, que anda na busca de culpables nos concellos e en tres das catro deputacións, xa que unicamente non critican á de Ourense que gobernan grazas a Jácome. Esta actitude do PP ao fronte do goberno galego “deixa abandonadas” a política social, educativa ou sanitaria que, sen competencias, intentan arranxar os gobernos municipais e provinciais, concluíu Otero.