Rosa Quintana destaca que o valor económico das descargas da lonxa de Burela aumentou nun 10% o pasado ano con preto de 67 millóns de euros

Burela, 11 de agosto de 2022. A conselleira do Mar, Rosa Quintana, visitou esta tarde a lonxa de Burela, a segunda que máis facturou o ano pasado en primeira venda en Galicia, despois da de Vigo. Neste sentido, a titular de Mar, que estivo acompañada polo director xeral de Pesca, Acuicultura e Innovación Tecnolóxica, Antonio Basanta, destacou que o valor económico das descargas de produtos do mar nesta rula no 2021 ascendeu un 10,5% con respecto ao ano anterior, alcanzando case os 67 millóns de euros.

En total, este centro de primeira venda lucense descargou máis de 19.000 toneladas o pasado ano, sendo a pescada, con máis de 9.000 toneladas descargadas, a principal especie desta lonxa. No que vai de ano, este peixe tamén está a ser o protagonista da primeira venda no centro, chegando case ás 4.000 toneladas. A visita de hoxe enmárcase na rolda de contactos que mantén de xeito periódico a Consellería do Mar coas distintas entidades do sector para estudar e coñecer as necesidades de cada zona e buscar posibles solucións.