Pablo Ferrández marabilla no Auditorio Pascual Veiga de Mondoñedo

Mondoñedo, 23 de agosto, 2022. Pablo Ferrández, un dos mellores violonchelistas do mundo, actuou este luns 22 de agosto nun dos concertos estelares do noveno ‘Festival Bal y Gay’ con 240 espectadores abarrotando o Auditorio Pascual Veiga de Mondoñedo. O público constatou as múltiples virtudes polas que o músico madrileño de 31 anos converteuse nun dos mozos máis admirados da escena estatal, transcendendo nos últimos anos a nivel mundial: autenticidade sobre o escenario, magnetismo de ídolo pop, gran son, técnica superior e excitante musicalidade. Ferrández rendeu pleitesía a Bach interpretando de maneira excepcional os seus tres primeiras suites, caracterizadas por unha dificultade máxima.

O Cuarteto Quiroga ofrecerá este martes 23 de agosto na Basílica de San Martiño de Foz (20:30 horas, entradas esgotadas) o penúltimo concerto nesta novena edición do ‘Festival Bal y Gay’. Aitor Hevia (violín), Cibrán Sierra (violín), Josep Puchades (viola) e Helena Poggio (violoncelo) regresarán á Mariña tras a súa exitosa actuación de 2020 no mesmo lugar como un dos cuartetos máis dinámicos e singulares da súa xeración. Aclamado internacionalmente por crítica e público, a súa personalidade única abordando o repertorio para cuarteto de corda pode percibirse en cada nota. O programa inclúe obras de Haydn (Cuarteto op. 74 n. 1 en Do maior), Canales (Cuarteto op. 3 n. 5 en Sol maior) e Brahms (Cuarteto op. 51 n. 2 na menor).