O motivo desta visita foi coñecer de primeira man o Centro de Atención a Maiores de Ribadeo, un centro público, pioneiro en Galiza e que forma parte da rede de CAMs da Deputación de Lugo que ademáis é, sen dúbida, un equipamento no que se coidan ás persoas, un centro no que están atendidas como se merecen, nese tramo da vida en que, despois de ter dado tanto, tamén merecen ter unha vida tranquila, segura e con afecto.
Xa dentro, puido charlar coas persoas usuarias e co persoal que as atende. Coñeceu as distintas actividades que se desenvolven na Residencia de Maiores de Ribadeo (coro, actividades físicas, ao aire libre, etc.) e escoitou da man de Fernando Suárez Barcia a importante achega de toda a veciñanza, a través da mobilización cívica, na reclamación desta residencia para Ribadeo.
Ana Pontón quixo recalcar que “sabemos que este foi un proxecto que custou moito, no que se implicaron man a man o Concello de Ribadeo e a Deputación, para construílo e poñelo en marcha, un Centro de carácter público e de calidade, do que hoxe estamos todos moi orgullosos”.
E engadiu que “o noso modelo, o modelo BNG, pasa por coidar ás persoas, por un sistema público de calidade, como o que demostrou o goberno de Ribadeo, cando considerou que unha residencia pública era unha prioridade para o concello e apostou por facela realidade”.
“En Ribadeo, Fernando Suárez presidindo o Concello xunto coa participación da Deputación de Lugo decidiu non agardar por ninguén, porque tampouco había moito polo que agardar, e poñer mans á obra e como resultado desa acción de goberno temos esta magnífico Centro de Atención a Maiores que, cómpre lembralo, non contou nin con un só euro da Xunta de Galicia, que é a que ten as competencias nesta materia”.
Pola súa parte Fernando Suárez dixo que “para nós é un orgullo que a formación política que representamos en Ribadeo valore expresamente o esforzo, o traballo e a loita de todo un pobo para conseguir ver feito realidade o noso soño colectivo: unha nova residencia pública en Ribadeo, principalmente para os de aquí e a prezos asumibles para as súas economías. E ademais, como exemplo de cooperación institucional entre dúas administración distintas coma o Concello e a Deputación. Moi afastado todo do desleal goberno da Xunta que torpedeou canto puido e máis e non acabou poñendo un euro nin na creación nin na xestión, cando é da súa competencia. Van tres anos agora do inicio deste Centro de Atención a Maiores de carácter público e xestión directa compartida entre o Concello e mais a Deputación. Temos novos retos. Sabemos que un Concello debe investir en infraestruturas, camiños, rúas, etc. Pero tamén o debe facer en mocidade, en cultura e no Benestar dos Maiores. Os nosos esforzos agora están volcados na necesaria mellora que deberá ter a outra Residencia que temos, o hospital-Asilo. Veremos se desta volta a Xunta se implica. O pobo está á espera”.
Fernando Suárez e Ana Pontón estiveron acompañados por Daniel Castro, deputado do BNG no Parlamento de Galiza, Antonio Veiga, responsable comarcal do BNG-A Mariña e polos concelleiros Pablo Vizoso, Jorge Díaz e Mónica Freire.