Antonio Valea comezou indicando as características morfolóxicas que permiten distinguir a velutina doutras especies semellantes, despois explicou o seu ciclo vital e a forma de facer trampas caseiras baratas e eficaces. A continuación, Marcos Villamil, repasou os distintos líquidos empregados como atraentes e insistiu na importancia de comezar a facer o trampeo na primavera. Cada raíña capturada será un niño menos e suporá evitar a saída dunhas 25.000 obreiras e de centos de novas raíñas. Pola súa parte, Jesús Rodríguez, insistiu na importancia de axudar na loita contra unha especie invasora que supón un perigo para as abellas e merma a polinización vexetal.
Polo tanto, estes días, as profesoras de bioloxía Ana Rodríguez, Beatriz González e Susi Besteiro, dedicaron algunha das clases de bioloxía a construir trampas caseiras con botellas de plástico e prepararon no laboratorio atraente barato e eficaz mesturando por cada 2,5 litros de auga, 1 kg de azucre e 25 gramos de levadura fresca.
Como veñen facendo os últimos anos, instalarán algunhas trampas no xardín do instituto pero cada alumno ou alumna de 1º eso tamén se vai responsabilizar de colocar unha trampa nas inmediacións da súa casa sobre algún arbusto ou árbore con flor. Queda aberto un concurso para ver que trampea máis e mellor ata final de curso, animan a toda a comunidade escolar a colaborar no trampeo de raíñas de velutina e dende o IES Ribadeo Dionisio Gamallo agradecen a colaboración da asociación Os Abelleiros.