Logo de varios meses e varias reunións coa empresa, mesmo con pequenos avances en materia social, as negociacións están encalladas no económico. Para Xoán Díaz da Federación de servizos da CIG, “non se pode permitir, que en pleno século XXI, nun mesmo complexo industrial, coas dimensións e características do que estamos a falar, siga existindo unha enorme fenda salarial entre a totalidade da plantilla da empresa con respecto ao resto de empresas auxiliares e da empresa principal, é inconcebible que se tenten perpertuar certas actividades a ser actividades de segunda”.
Ambas delegadas coinciden ademais en sinalar que están fartas de ser as “cenicientas” do complexo industrial, e que se algo demostrou a pandemia é que a limpeza é un sector esencial, imprescindible e xa vai sendo hora que tamén se recoñeza iso salarial e laboralmente.
Paradoxicamente, a mesma Jofrasa ten asumidos acordos ou convenios de empresa en complexos industriais tan cercanos como o de As Pontes, cunhas condicións económicas moi superiores ás que aquí se están poñendo sobre a mesa. Polo tanto a plantilla decidiu en asemblea que aínda valorando as melloras sociais, non se ratificará ningún acordo que non implique unha mellora económica e que esta abarque ao conxunto da plantilla. E é por isto que logo de que a asemblea de traballadores e traballadoras decidise en asemblea iniciar mobilizacións con concentracións á entrada de mañá do truno ordinario de fábrica, as cales se viñan desenvolvendo os mércores dende o 03 de novembro, unha nova asemblea celebrada o pasado 16 decidiu intensificar ditas mobilizacións, convocándose así unha folga indefinida que comeza este mércores, 01 de decembro. Ao mesmo tempo seguiranse levando a cabo as concentracións co mesmo horario e lugar.
No tocante aos servizos mínimos a empresa convocou ás representantes sindicais a unha reunión na que non houbo acordo. A limpeza, e mais nomeadamente en instalacións privadas, non está recollida pola xurisprudencia como un sector esencial susceptible de ter que asumir servizo mínimo algún. Si o está a sanidade polo que o único servizo mínimo que se podería aceptar sería o da limpeza do servizo médico. A esta hora oficialmente non sabemos se a empresa os vai tratar de impoñer ou non. A representación non recibiu escrito ningún a ese respecto, “ non sabemos se individualmente algun compañeiro ou compañeira recibiu algún escrito de nomeamento, pero entendemos que sería preceptivo que independetemente de que houbese ou non acordo se nos informase a nós nese senso”.
Así mesmo, varios traballadores e traballadoras, en especial eventuais están denunciando, en privado, presións de mandos intermedios da empresa para tratar de boicotear a folga, con ameazas de non renovacións de contrato e ou despedimentos. Para o representante de CIG Servizos, “estase tratando de vulnerar o dereito lexítimo da plantilla a secundar unha folga, isto é algo grave e que estudaremos as medidas a tomar ao respecto”. En todo caso, para as delegadas sindicais “esta práctica é algo que aínda nos dá máis folgos para loitar, se hai presións é porque ven que por fin a plantilla está decidida a defender os seus dereitos, e cando se chega a ese punto ata que se chegue a un acordo xa non pode haber marcha atrás”