O vindeiro luns, 4 de outubro, Sogama procederá á cancelación da licitación desta instalación e o Concello de Riotorto revocará o acordo de cesión da referida parcela.
Na actualidade, estanse a estudar outras alternativas, buscando unha parcela que cumpra os requisitos técnicos e que non cause prexuizo algún aos veciños do municipio.
O rexedor de Riotorto non quere deixar escapar esta oportunidade de investimento no Concello, que xerará empregos locais e unha actividade económica sostible na nosa localidade.
Xamais a administración local pretendeu prexudicar a ningún veciño de Aldurfe con esta instalación que agora se cancela. A elección da ubicación obedecía únicamente a criterios técnicos e loxísticos, considerándoa idónea e beneficiosa para a xeración de postos de traballo na zona, coa particularidade de que traería consigo diversos beneficios para o barrio en virtude dun convenio a asinar con Sogama para a mellora de infraestruturas viarias na parroquia.
MARCO DE REFERENCIA
A actual microplanta de Riotorto leva operando desde o ano 2007 sen incidencias. Non obstante, e tendo en conta que os concellos galegos deberán implantar a recollida selectiva da materia orgánica a través do quinto contedor (de cor marrón) antes do 31 de decembro de 2023, Sogama decidiu transformar esta microplanta, xunto con outras que operan en diversos puntos de Galicia, nunha planta de transferencia con maior capacidade, máis e mellores prestacións, e máis eficiente.
A día de hoxe, na microplanta, que da servizo a Riotorto, Meira, A Pastoriza, Pol, A Pontenova e Ribeira de Piquín, únicamente se transvasa a denominada bolsa negra recollida por parte dos camións municipais a contedores de maior capacidade e aptos para ser transportados, nas mellores condicións, ata o Complexo Medioambiental de Sogama en Cerceda.
O obxectivo da compañía é que, ademais da bolsa negra, nesta instalación se poida transferir a bolsa amarela (que agora mesmo se entrega na planta de Barreiros) e, no seu momento, os residuos orgánicos do contedor marrón.
Desta forma, o Concello de Riotorto e municipios que utilizan os servizos da actual microplanta, evitarían o transporte destes refugallos á planta de Barreiros, situada a uns 50 quilómetros de distancia, o que provocaría un notable incremento de custos, tanto ambientais (derivados do traslado de lixo por estrada, coas conseguintes emisións de CO2 á atmosfera) como económicos para as arcas locais e, polo tanto, para o peto da veciñanza.
É preciso recordar que a única función das plantas de transferencia (hai 37 distribuidas polo conxunto do territorio galego que operan desde hai moitos anos con absolutas garantías medioambientais e para a saúde) é transvasar os residuos para que poidan recibir tratamento no Complexo de Sogama en Cerceda (A Coruña).
Nestas infraestruturas non hai manipulación nin almacenamento nin tratamento de residuos, sendo ben acollidas polos cidadáns e Concellos.