O novo Centro de Atención e Información da Seguridade Social, situado na avenida Ramón Canosa, número 8, comezará a funcionar este venres, unha vez acondicionadas as dependencias que dan servizo a unha poboación potencial de máis de 39.000 veciños dos concellos de Viveiro, O Vicedo. Xove, Cervo, Burela, O Valadouro, Ourol, Muras e Mañón.
Isabel Rodríguez lembrou que a apertura do novo Centro de Atención e Información da Seguridade Social de Viveiro supón a culminación dun proxecto longamente agardado, que permanecía atascado ata que o Goberno de Pedro Sánchez lle deu o pulo definitivo.
Tal como anunciou o delegado do Goberno, José Miñones, nunha recente visita a Viveiro, a entrada en servizo das novas instalacións prodúcese logo do acondicionamento do edificio que foi recepcionado pola Seguridade Social a principios do verán.
Segundo informou o director provincial da Seguridade Social, Juan José Rodríguez Gude, o traslado do servizo ao novo edificio foi comunicado á cidadanía mediante carteis informativos instalados tanto no novo centro como no antigo e tamén se deu conta do cambio de ubicación a todas as persoas que tiñan concertada cita para estas datas.