O edil de Turismo subliñou que “foi un verán marcado por algunhas restricións a nivel sanitario, pero foi moi positivo para o turismo en Burela e en xeral en toda A Mariña houbo unha gran afluencia de xente. En canto a datos numéricos temos que dicir que en xullo tivemos 1.703 visitas na oficina de turismo pedindo información e en agosto 2.168. Estas cifras son positivas e están recuperando a tendencia de antes da pandemia. Calquera que viñera a Burela podía ver moitísima xente polas rúas e nas praias. Os hoteis tiveron unha ocupación durante estes meses que practicamente roldou o cen por cen todos os días co cal nese aspecto a valoración non pode ser máis que positiva”. Sobre a procedencia dos visitantes comentou que “a xente que se achegaba á oficina de turismo para pedir información sobre Burela e A Mariña na súa maioría eran de Madrid e tamén tivemos moita xente de Castela e León e do País Vasco”.
Ramiro Fernández contou que “no barco museo, pese ás restricións que tíñamos de visitas limitadas a dez persoas por cada quenda, recuperamos os números de 2019. En agosto tivemos un pouco menos de xente, pero o mes de xullo foi espectacular e case dobramos a afluencia do ano 2019 que foi bo, o cal quere dicir que o barco museo Reina del Carmen cada vez ten máis tirón e é un atractivo turístico moi importante en Burela. Ademais as xeorutas, que aínda estamos facendo e temos varias este mes, como sempre están funcionando moi ben e a ocupación todos os días foi practicamente do cen por cen, incluso moita xente que fixo as xeorutas, xente de fora, enviaron correos ao Concello felicitándonos pola iniciativa, o cal quere dicir que temos que seguir apostando por elas. E as visitas á Igrexa do Medio foi o que non acabou de funcionar todo o ben que nos gustaría, así que temos que seguir insistindo pois entendemos que é un atractivo turístico máis para Burela. Houbo xente, pero non toda a que nosoutros pretendíamos que fora a esas visitas. Seguiremos intentando explotar como recurso turístico as pinturas da Igrexa da Vila do Medio”.
Burela na Feira Semana Verde de Galicia
O concelleiro de Turismo, Ramiro Fernández, anunciou que “este fin de semana estaremos na Feira Semana Verde de Galicia, que se vai desenrolar en Silleda. Imos ter un stand onde imos promocionar a Feira do Bonito. Quero agradecer a Ledicia, que vai ser a encargada da degustación de bonito que imos facer o domingo, ás doce e media. Xa é a terceira vez que a facemos, sempre foi un éxito e esperemos que este ano tamén siga funcionando, a pesar das restricións sanitarias que nos imos encontrar na feira. A Semana Verde é unha feira á que asiste moitísima xente, penso que é moi interesante para Burela polo público que queremos traer aquí. Imos intentar promocionar tanto a Feira do Bonito como os outros atractivos turísticos que temos”.
O edil burelés engadiu que “seguimos avanzando e cada vez tendo máis xente que ten interese en vir pasar as súas vacacións en Burela. A xente que ven á Mariña non ven especialmente a un sitio, senón que temos unha riqueza enorme e os visitantes desprázanse de un lado para outro para ver eses recursos turísticos que temos en toda a comarca. En Burela foi un verán moi positivo, esperemos que sigamos así, este ano foi de recuperación turística e confiamos en seguir medrando e traballando para que cada vez teñamos un pobo máis atractivo e que a xente queira vir aquí a pasar as súas vacacións”.