Foz, 4 de agosto de 2021. O Concello de Foz segue apostando pola cultura segura, amenizando os días dos focegos e os visitantes con actividades durante todo o mes de agosto.
A concelleira Inés López Couto explica que “a cultura é segura e debemos seguir apoiando a un sector que o pasou mal e que nos proporciona saber, lecer e vida. Uns profesionais dos que desfrutamos grazas á lectura, ás obras teatrais, aos filmes ou á música. A cultura dun país coma o noso, que é moi ampla e que nos trae beneficios mentais nun momento no que a saúde mental é fundamental despois do enorme sufrimento que levamos pasado pola pandemia mundial, debe seguir sendo bandeira dun concello coma Foz. Por iso na delegación municipal de Cultura continuamos traballando con autores e músicos locais e de toda Galicia, dando cabida na programación a músic@s, actrices e actores, escultores, mag@s e autores literarios de moi diversa índole, que promoven a nosa lingua e a nosa cultura e que traballan para a difusión da mesma”.
Inés López Couto engade que “así mesmo a Foz chegará tamén a música doutros moitos puntos de España coa colaboración que o Concello leva a cabo co Festival Bal y Gay, que dende o 18 de agosto e ata o 26 do mesmo mes achegará a música clásica á Mariña. En Foz poderanse desfrutar concertos o día 18 no pazo de Fontao co cuarteto Seikilos, o día 19 na Igrexa Parroquial de Foz con Cantoría, o día 22 na Finca Goleta con Puro Gershwin e día 26 na Basílica de San Martiño co Cuarteto Casals (entradas esgotadas en todos os concertos)”.
A edil anuncia tamén que “a aposta pola cultura local nótase tamén na elección do pregoeiro do San Lourenzo 2021, que este ano será Paco Rivas: poeta de Nois, sobradamente coñecido entre os veciños, pregoará o día 6 de agosto un San Lourenzo atípico pero que virá con múltiples concertos de formato reducido e actividades para os máis pequenos. O día 6 será o día da cultura local, xa que o CENIMA a partir das 20 horas acollerá a inauguración da exposición doutro focego que coa súa escultura leva a Foz por todo o mundo, Otero Regal, que con Hai mulleres mostraranos unha pequena parte do seu traballo. Así mesmo Paco Rivas presentará o seu libro Auxías, un poemario que poboará os anaqueis das librerías para todos aqueles amantes da boa literatura. Ás 21 horas a atención desprazarase á Praza Rosalía de Castro, que será o escenario do pregón do poeta e que unha vez finalice amenizarase a noite co concerto da banda local Son’s Varadero, dentro do programa Sons na Rúa”.
Inés López destaca tamén que “os pequenos eventos continuarán con concertos na praza Conde de Fontao e na Praia da Rapadoira ás 13 horas, así como na Praza Conde de Fontao ás 22 horas dende o sábado ata o martes. O sábado 7 ás 20 horas na praza Conde de Fontao Títeres Alakrán chegará co seu espectáculo Circo Galaico, que fará as delicias dos máis pequenos, así coma o domingo 8, no que será o Mago Antón o que aparque o seu camión na coñecida praza, durante todo o día, enchendo de maxia Foz. O martes 10 de agosto, festivo en Foz, será o día das bandas. Ás 13 horas A Rebolaxe estará en Conde de Fontao e, como colofón á cultura local no San Lourenzo, ás 20 horas no Polideportivo do Campo da Cabana terá lugar o tradicional concerto da Banda de Música de Foz”.
O Cine na Rúa seguirá dando a volta ao concello con sesións ás 22.30 horas, para chegar á Praza do Concello o xoves 5 con Las Niñas, a Cangas o venres 6 de agosto con Dr. Dolittle, o 10 de agosto en San Martiño con Mujercitas, o xoves 12 na Praia da Rapadoira con Jojo Rabbit, o venres 13 en San Acisclo con Padre no hay más que uno, en formato autocine no aparcamento de Valle Inclán o xoves 19 con Bohemian Rhapsody e o día 20 en Cordido con Playmobil la película.
O teatro continuará todos os martes no pavillón do colexio Número 1. Tamén haberá Sons na Rúa con grupos locais os venres en varias prazas municipais ás 21 horas.
A Feira do Libro volverá a Foz a partir do xoves 19 de agosto en horario de 17 a 22 horas na praza Conde de Fontao; contará con presentacións e sinatura de libros por parte de varios autores.
O Sons na Rúa terá tamén grupos de fóra de Foz, que poboarán os fins de semana do 14 e 15 de agosto e o 21 e 22 de agosto. Haberá concertos de djs en formato sesión vermú a partir das 12:30 horas e sesión de noite con grupos. O día 14 de agosto ás 21:30 horas na praza Conde de Fontao contaremos con Os amigos dos músicos, o día 15 no Parque Rosalía de Castro a banda será Sabela King & The Heartbreakers. Na fin de semana do 21 de agosto será o turno de The fabulous resaca brothers, na Praia da Rapadoira ás 21.30 e o domingo 22 ás 20.30 na praza Rosalía de Castro será Galifunk brass quen amenice.
“Todas as actividades serán con cadeiras, máscara e distancia de seguridade. Así mesmo haberá que anotar nome e teléfono para acceder aos recintos, cumprindo a normativa da Xunta de Galicia de prevención do COVID-19. Pedimos responsabilidade para todos aqueles que desfruten de Foz durante o mes de agosto porque o noso pobo é un lugar precioso para descansar e vivir pero tamén debemos coidar del. A nosa saúde é a de todos. A saúde e a cultura van da man, sen unha non hai outra, é a nosa responsabilidade apoiar ao comercio, a hostalería e ao sector cultural respectando as medidas. Vamos todos da man”, finaliza a concelleira de Cultura.
Toda a programación pode consultase no cartel e nas redes sociais do Concello de Foz.
Reclamaron unha xuntanza urxente para abordar a situación da fábrica e maior implicación dos goberntos estatal e autonómico.
Os seus editores, Carlos Baliñas Pérez (USC) e Carlos Andrés González Paz (IEGPS), acompañados pola directora do Museo Provincial de Lugo, Aurelia Balseiro, explicaron o contido do libro, que constitúe unha revisión diacrónica da traxectoria histórica da vila de Castro d’Ouro desde a Idade do Ferro ata finais do Antigo Réxime e que reúne os relatorios presentados por expertos de recoñecida traxectoria investigadora durante as “Xornadas de Estudos Históricos”, (2 e 3 de outubro de 2020, centro sociocultural de Alfoz), con motivo do octinxentésimo aniversario da vila de Castro d´Ouro (1220-2020).
Esta familia naceu arredor de cinco irmáns: Paco, Esperanza, Toñito, Juan José (Sé) e Joaquín. Tocoulles vivir tempos difíciles na xuventude, véndose obrigados algúns deles a emigrar. Na reunión estiveron presentes os tres que se ven na foto: Esperanza, Sé e Joaquín, xunto con fillos, sobriños, etc. Unha reunión entrañable, porque había bastante tempo que a familia non se reunía.
Aproveitouse despois para ver o partido entre Almería e Dépor lembrando "as peñas irmáns que hai polo territorio estatal". A peña burelá agarda repetir nova cita antes do remate da actual tempada coa intención de celebrar éxitos dos distintos equipos que compoñen a estrutura do RC Deportivo.
A Garda Civil imputa en calidade de investigada a unha veciña de San Miguel de Reinante de 38 anos de idade como suposta autora dun delito de simulación de delito. A persoa investigada denuncio en dependencias oficiais dous cargos indebidos na súa conta bancaria. Iniciouse entón unha investigación policial comprobando documentalmente que os cargos se corresponden con dúas cotas dun préstamo ao consumo contratado pola investigada e ingresado na súa propia conta. Supostamente a persoa investigada pretendía que a entidade bancaria devolvéselle os importes das cotas domiciliadas tras formular a denuncia ante a Garda Civil. As dilixencias policiais foron remitidas á Autoridade Xudicial
Destacou a súa importancia para preservar a memoria histórica e recoñecer o esforzo das xeracións que converteron o porto de Celeiro nun referente pesqueiro. Puxo en valor o rico patrimonio mariñeiro e cultural da Mariña, facendo fincapé “que esta exposición é unha oportunidade para recoñecer o esforzo e a dedicación das persoas que ao longo de cen anos contribuíron ao crecemento e consolidación do porto celeirense”. A mostra, situada na sede da confraría, inclúe maquetas de barcos, fotografías, vídeos históricos, pinturas dos patróns maiores e obxectos singulares como a acta fundacional e maquinaria antiga. A visita complétase cun percorrido por espazos emblemáticos como a lonxa e o porto. Os actos do centenario culminarán coas XXVIII Xornadas Técnicas de Difusión do Sector Pesqueiro, un referente anual do sector.
Este evento anual destaca pola súa coidada selección musical e por ofrecer unha experiencia única na localidade lucense de Vilalba. Tras o éxito da pasada edición, que superou os 6.000 asistentes e contou con actuacións destacadas como as de Iván Ferreiro, Dorian e El Columpio Asesino, o FIV segue apostando por grandes nomes do indie nacional. As primeiras confirmacións do cartel serán anunciadas nas vindeiras semanas, mantendo a emoción e as expectativas para esta nova cita.
